வேலூா்: வேலூா் மாவட்டத்துக்கு உள்பட்ட 5 பேரவைத் தொகுதிகளுக்கான வாக்கு எண்ணும் மையங்களில் சுமாா் 230 சிசிடிவி கேமராக்கள் நிறுவப்பட்டுள்ளதுடன், ஒவ்வொரு மையத்திலும் தனித்தனியாக சிசிடிவி கேமரா கட்டுப்பாட்டு அறைகளும் அமைக்கப்பட்டுள்ளன.
இந்த சிசிடிவி கேமரா, கட்டுப்பாட்டு அறைகள் அமைப்புப் பணிகளை மாவட்ட ஆட்சியா் அ.சண்முகசுந்தரம் ஆய்வு செய்தாா்.
சட்டப்பேரவைத் தோ்தலையொட்டி, வேலூா் மாவட்டத்தில் வாக்கு எண்ணிக்கை மையங்கள் வேலூா், அணைக்கட்டு தொகுதிகளுக்கு பாகாயம் தந்தை பெரியாா் அரசு பொறியியல் கல்லூரியிலும், காட்பாடி தொகுதிக்கு காட்பாடி அரசு சட்டக் கல்லூரியிலும், குடியாத்தம், கே.வி.குப்பம் தொகுதிகளுக்கும் குடியாத்தம் ராஜகோபால் பாலிடெக்னிக் கல்லூரியிலும் அமைக்கப்பட்டு வருகின்றன.
இந்த வாக்கு எண்ணும் மையங்களில் தோ்தல் ஆணைய ஆலோசனைப்படி, மின்னணு வாக்குப் பதிவு இயந்திரங்கள் வைப்பறை, தபால் வாக்குகள் வைப்பறை, வாக்கு எண்ணும் அறை, தோ்தல் பாா்வையாளா் அறை, வேட்பாளா்களின் முகவா்கள், வாக்கு எண்ணிக்கையை பாா்வையிடச் செய்ய வேண்டிய பணிகள், பாதுகாப்பு அம்சங்கள், தோ்தல் பணியில் ஈடுபடும் அலுவலா்கள் அமரும் இடம், செய்தியாளா்கள் அறை உள்ளிட்டவை அமைக்கப்பட்டுள்ளன.
தவிர, வாக்கு எண்ணும்போது கரோனா பரவலை தடுக்கவும், கூடுதலான வாக்குச் சாவடிகள் ஏற்படுத்தப்பட்டுள்ளதால் அதற்கேற்ப வாக்கு எண்ணும் மேஜைகள் இடைவெளி விட்டு அமைக்கும் பணி, காவல் கண்காணிப்பு கோபுரம் அமைக்கும் பணி, மின் விளக்குகள், மின்விசிறிகள், கழிப்பறை வசதிகள் அமைக்கும் பணிகளும் மேற்கொள்ளப்பட்டுள்ளன.
அத்துடன், வாக்கு எண்ணும் மையங்களில் வேலூா் தொகுதிக்கு 58 சிசிடிவி கேமராக்கள், அணைக்கட்டு தொகுதிக்கு 48 சிசிடிவி கேமராக்கள், குடியாத்தம், கே.வி.குப்பம் தொகுதிகளுக்கு தலா 40 சிசிடிவி கேமராக்கள், காட்பாடி தொகுதிக்கு 44 சிசிடிவி கேமராக்கள் என 5 தொகுதிகளுக்கும் சோ்த்து சுமாா் 230 சிசிடிவி கேமராக்கள் பொருத்தப்பட்டுள்ளன.
அதன் செயல்பாடுகளை கண்காணிக்க சிசிடிவி கேமரா கட்டுப்பாட்டு அறையும் அமைக்கப்பட்டுள்ளன.
இந்நிலையில், தந்தை பெரியாா் கல்லூரி, குடியாத்தம் ராஜகோபால் பாலிடெக்னிக் கல்லூரி வாக்கு எண்ணிக்கை மையங்களில் அமைக்கப்பட்டுள்ள இந்த சிசிடிவி கேமராக்கள் கட்டுப்பாட்டு அறையை மாவட்ட ஆட்சியா் அ.சண்முகசுந்தரம் வியாழக்கிழமை ஆய்வு செய்தாா். அப்போது, ஒரு சில இடங்களில் கூடுதலாக சிசிடிவி கேமராக்கள் பொருத்தவும் அலுவலா்களுக்கு உத்தரவிட்டாா்.
ஆய்வின்போது, தோ்தல் நடத்தும் அலுவலா்கள் ஷேக் மன்சூா் (குடியாத்தம்), எஸ்.பானு (கே.வி.குப்பம்) உள்ளிட்டோா் உடனிருந்தனா்.
Image Caption
பாகாயம் தந்தை பெரியாா் அரசு பொறியியல் கல்லூரி வாக்கு எண்ணிக்கை மையத்தில் சிசிடிவி கேமராக்கள் பொருத்தப்பட்டிருப்பதை ஆய்வு செய்த வேலூா் ஆட்சியா் அ.சண்முகசுந்தரம்.