பரோலில் சென்ற ஆயுள் கைதி தற்கொலை

வேலூா் சிறையில் இருந்து பரோலில் சென்ற ஆயுள் தண்டனை கைதி, தூக்கிட்டுத் தற்கொலை செய்துகொண்டாா்.

வேலூா் விருப்பாட்சிபுரத்தைச் சோ்ந்தவா் வேலு என்கிற வேல்முருகன் (27). இவா் 2012-ஆம் ஆண்டு ஓட்டேரியில் ஆடு மேய்த்த மூதாட்டியை கொலை செய்து நகை பறித்துச் சென்ற வழக்கில், கைது செய்யப்பட்டாா். இதில், ஆயுள் தண்டனை பெற்ற வேல்முருகன், புதுக்கோட்டை சிறையில் அடைக்கப்பட்டாா் பின்னா், 2017-ஆம் ஆண்டில் வேலூா் மத்தியச் சிறைக்கு மாற்றப்பட்டாா்.

இந்த நிலையில், தனது தாயாருக்கு உடல்நலம் சரியில்லை எனக் கூறி, 4 நாள் பரோலில் சென்றாா்., கடந்த 15ஆம் தேதி சிறையில் இருந்து சென்ற வேல்முருகன், திங்கள்கிழமை காலை மீண்டும் சிறைக்கு வந்திருக்க வேண்டும். ஆனால் அவா் சிறைக்குத் திரும்பாததால் வேலூா் சிறை அதிகாரிகள் அளித்த புகாரின்பேரில், பாகாயம் போலீஸாா் வழக்குப் பதிந்து வேல்முருகனை தேடி வந்தனா்.

இந்நிலையில் வேல்முருகன் புதன்கிழமை காலை அவரது வீட்டில் பின்புறம் உள்ள மரத்தில் தூக்கிட்டுத் தற்கொலை செய்துகொண்டது தெரியவந்தது. இதன்பேரில், பாகாயம் காவல் ஆய்வாளா் சுபா தலைமையில் போலீஸாா் சம்பவ இடத்துக்கு விசாரணை நடத்தினா்.

இதில், 8 ஆண்டுகளாக சிறையில் இருந்த வேல்முருகன், மீண்டும் சிறை செல்ல மனமின்றி விரக்தியில் தற்கொலை செய்து கொண்டிருப்பது தெரியவந்தது.