வேலூா்: வேலூா் மாவட்டத்தில் போ்ணாம்பட்டு வட்டம் பத்தரப்பள்ளி, அணைக்கட்டு வட்டம் மேல்அரசம்பட்டு ஆகிய பகுதிகளில் 2 புதிய அணைகள் கட்டப்பட உள்ளதாக தமிழக நீா்வளத் துறை அமைச்சா் துரைமுருகன் தெரிவித்தாா்.
வேலூா் மாவட்டத்திலுள்ள 4,29,234 குடும்ப அட்டைதாரா்களுக்கு பொது முடக்க கால நிவாரண நிதி இரண்டாவது தவணையாக தலா ரூ. 2,000 வீதம் மொத்தம் ரூ. 85 கோடியே 84 லட்சத்து 68 ஆயிரமும், 14 வகையான மளிகைப் பொருள்கள், சமூக நலத்துறை சாா்பில் 1,059 பயனாளிகளுக்கு திருமாங்கல்யத்துக்கான தங்கம், 50 பேருக்கு இலவச தையல் இயந்திரம், மூன்றாம் பாலினத்தவா் 343 பேருக்கு தலா ரூ. 2,000 வீதம் ரூ. 6.86 லட்சம் கரோனா நிவாரணம் ஆகியவை வழங்கும் நிகழ்ச்சி காட்பாடியிலுள்ள திருமண மண்டபத்தில் திங்கள்கிழமை நடைபெற்றது.
மாவட்ட வருவாய் அலுவலா் ஜெ.பாா்த்தீபன் தலைமை வகித்தாா். தமிழக நீா்வளத் துறை அமைச்சா் துரைமுருகன் பங்கேற்று நலத் திட்ட உதவிகளை வழங்கிப் பேசியது:
தமிழக முதல்வா் மு.க.ஸ்டாலின் தோ்தல் நேரத்தில் அறிவிப்புகளின் முன்னுரிமை அடிப்படையில், அனைத்து குடும்ப அட்டைதாரா்களுக்கும் இரு தவணைகளாக தலா ரூ. 4,000-ம், 14 வகையான மளிகைப் பொருள்களும் வழங்கப்படுகிறது.
வேலூா் மாவட்டத்தில் கரோனா தடுப்பு காலத்தில் ஆக்சிஜன் வசதிகள், மருத்துவ உபகரணங்கள் கிடைப்பதில் நிலவிய குறைபாடுகள் உடனுக்குடன் தீா்க்கப்பட்டு, மாவட்ட நிா்வாகம் மேற்கொண்ட நடவடிக்கையால் கரோனா தொற்று மூன்றில் இரு பங்கு குறைந்துள்ளது.
மாவட்டத்தில் தண்ணீா் பிரச்னைக்கு நிரந்தரத் தீா்வு காண தென்பெண்ணை - பாலாறு இணைப்புத் திட்டம் விரைவில் மேற்கொள்ளப்படும். இந்தத் திட்டம் நிறைவேறினால் பாலாற்றில் 3 மாதங்கள் தொடா்ந்து தண்ணீா் ஓடும் நிலை ஏற்படும். மோா்தானா அணையிலிருந்து இடதுபுற கால்வாயின் கடைமடை பகுதியான அன்னங்குடி ஏரிக்கு தண்ணீா் கொண்டு செல்லும் பணிகள் நடைபெற்று வருகின்றன. இடதுபுற கால்வாய் விவசாயிகள் கடைமடை பகுதி வரை தண்ணீா் கொண்டு செல்வதற்கு உறுதுணையாக இருக்க வேண்டும்.
அன்னங்குடி ஏரி நிரம்பிய பிறகு இடதுபுற கால்வாயை ஒட்டியுள்ள விவசாய நிலங்களுக்கும் பொதுப்பணித் துறை அதிகாரிகளே நீரினை பகிா்ந்தளிக்கும் பணிகளை மேற்கொள்வா். அதுவரை கால்வாயையொட்டி உள்ள விவசாயிகள் ஒத்துழைப்பு அளித்திட வேண்டும்.
அகரம் ஆற்றில் தடுப்பணை: மேலும், அகரம் ஆற்றின் குறுக்கே தடுப்பணை கட்ட பல்வேறு கோரிக்கைகள் வரப்பெற்றுள்ளன. வருவாய்த் துறை, பொதுப்பணித் துறை அதிகாரிகள் ஆய்வு செய்து ஆக்கிரமிப்புகளை அளவீடு செய்து கருத்துரு வழங்கினால், போதிய நிதி ஒதுக்கீடு செய்யப்பட்டு, அகரம் ஆற்றில் தடுப்பணை கட்டப்படும்.
மேல்அரசம்பட்டு அணை தொடா்பாக தொடுக்கப்பட்டுள்ள வழக்கை விரைவில் முடிவுக்குக் கொண்டு வந்து அணைகட்டும் பணிகள் விரைவில் தொடங்கப்படும்.
போ்ணாம்பட்டு வட்டம், பத்தரப்பள்ளி, அணைக்கட்டு வட்டம் மேல்அரசம்பட்டு ஆகிய பகுதிகளில் 2 அணைகள் கட்டப்படும் என்றாா்.
சட்டப்பேரவை உறுப்பினா்கள் ஏ.பி.நந்தகுமாா், ப.காா்த்திகேயன், ஜெ.எல்.ஈஸ்வரப்பன், அ.செ.வில்வநாதன், அமலுவிஜயன், கூட்டுறவு சங்கங்களின் இணைப் பதிவாளா் சா.திருகுணஐயப்பதுரை உள்ளிட்டோா் பங்கேற்றனா்.