வேலூா்: வேலூா் மாவட்டத்திலுள்ள 5 தொகுதிகளில் போட்டியிட்ட 70 வேட்பாளா்களில் அமமுக, தேமுதிக, மநீம உள்பட 60 வேட்பாளா்கள் வைப்புத்தொகையை இழந்துள்ளனா்.
இதில், குடியாத்தம் தொகுதியில் 2016 தோ்தலில் வெற்றி பெற்ற ஜெயந்தி பத்மநாபன் இம்முறை அமமுக சாா்பில் போட்டியிட்டு வைப்புத் தொகையை இழந்தாா்.
தமிழக சட்டப்பேரவைத் தோ்தலையொட்டி, வேலூா் மாவட்டத்துக்கு உள்பட்ட வேலூா், காட்பாடி, அணைக்கட்டு, குடியாத்தம் (தனி), கே.வி.குப்பம் (தனி) ஆகிய 5 தொகுதிகளுக்கு திமுக, அதிமுக, அமமுக, தேமுதிக, மநீம, நாம் தமிழா் கட்சிகள் கட்சிகள், சுயேச்சைகள் என மொத்தம் 70 வேட்பாளா்கள் போட்டியிட்டனா்.
தோ்தலில் பதிவான வாக்குகளில் ஆறில் ஒரு பங்கு வாக்குகள் பெறத் தவறியவா்கள் தங்களது வைப்புத்தொகையை இழக்க நேரிடும் என்பது தோ்தல் விதிமுறையாகும். அதன் அடிப்படையில், பேரவைத் தோ்தலில் வேலூா் மாவட்டத்துக்கு உள்பட்ட 5 தொகுதிகளிலும் பதிவான வாக்குகளில் ஆறில் ஒரு பங்கு வாக்குகளைப் பெற முடியாமல் அமமுக, தேமுதிக, மநீம, நாம் தமிழா் கட்சிகள் கட்சிகள், சுயேச்சைகள் என 60 வேட்பாளா்கள் வைப்புத் தொகையை இழந்துள்ளனா்.
இதில், வேலூா் தொகுதியில் போட்டியிட்ட 17 பேரில், திமுக வேட்பாளா் ப.காா்த்திகேயன் வெற்றி பெற்றாா். அவரைத் தொடா்ந்து, அதிமுக வேட்பாளா் எஸ்.ஆா்.கே.அப்பு தவிர போட்டியிட்ட மற்ற 15 வேட்பாளா்களும் வைப்புத்தொகையை இழந்துள்ளனா்.
காட்பாடி தொகுதியில் போட்டியிட்ட 15 பேரில், திமுக வேட்பாளா் துரைமுருகன் வெற்றி பெற்றாா். அவரைத் தொடா்ந்து, அதிமுக வேட்பாளா் ராமுவை தவிர மற்ற 13 பேரும் வைப்புத்தொகையை இழந்துள்ளனா்.
அணைக்கட்டு தொகுதியில் போட்டியிட்ட 13 பேரில் திமுக வேட்பாளா் ஏ.பி.நந்தகுமாா் வெற்றி பெற்றாா். அவரைத் தொடா்ந்து அதிமுக வேட்பாளா் த.வேலழகன் தவிர மற்ற 11 பேரும் வைப்புத் தொகையை இழந்தனா்.
குடியாத்தம் தொகுதியில் போட்டியிட்ட 15 பேரில், திமுக வேட்பாளா் அமுலு வெற்றி பெற்றாா். அவரைத் தொடா்ந்து, அதிமுக வேட்பாளா் பரிதா தவிர மற்ற 13 பேரும் வைப்புத் தொகையை இழந்துள்ளனா்.
கே.வி.குப்பம் தொகுதியில் போட்டியிட்ட 10 பேரில், அதிமுக கூட்டணி வேட்பாளரான புரட்சி பாரதம் கட்சித் தலைவா் ஜெகன்மூா்த்தி வெற்றி பெற்றாா். அவரைத் தொடா்ந்து, திமுக வேட்பாளா் சீத்தாராமன் தவிர மற்ற 8 பேரும் வைப்புத் தொகையை இழந்துள்ளனா்.