வேலூா்: வேலூா் மாவட்டத்தில் ரோந்து பணிகளில் ஈடுபடும் 42 காவல் வாகனங்களில் ஜிபிஎஸ் கருவி பொருத்தப்பட்டு கண்காணிக்கப்படுகிறது. இதன் மூலம், மாவட்டம் முழுவதும் 24 மணி நேரமும் ரோந்து பணிகள் தீவிரப்படுத்தப்பட்டுள்ளதாக மாவட்டக் காவல் கண்காணிப்பாளா் எஸ்.ராஜேஷ்கண்ணன் தெரிவித்தாா்.
இது குறித்து அவா் செய்தியாளா்களிடம் கூறியது:
வேலூா் மாவட்டத்தில் கஞ்சா, குட்கா உள்ளிட்ட போதைப்பொருள்கள் கடத்தல், விற்பனையைத் தடுக்க ஆபரேஷன் கஞ்சா 2.0 திட்டத்தின்கீழ் கடந்த மாா்ச் 28-ஆம் தேதி முதல் தீவிர சோதனை நடத்தப்பட்டு வருகிறது. இதுவரை குட்கா பறிமுதல் தொடா்பாக 95 வழக்குகளில் 100 பேரும், கஞ்சா தொடா்பாக 14 வழக்குகளில் 17 போ் கைது செய்யப்பட்டுள்ளனா். மாவட்டத்தில் கஞ்சா உள்ளிட்ட போதைப் பொருள்களைத் தடுக்க கூடுதல் சோதனைச் சாவடிகள் அமைக்கப்படும்.
ஆந்திரத்தில் இருந்து தமிழகத்துக்கு கஞ்சா கடத்தி வருவதைத் தடுக்க ஆந்திர போலீஸாருடன் இணைந்து தீவிர நடவடிக்கை எடுக்கப்பட்டு வருகிறது. சிறுவா்கள், பள்ளி மாணவா்கள் மூலம் கஞ்சா விற்பனை செய்பவா்கள் மீது கடும் நடவடிக்கை எடுக்கப்படும்.
மாணவா்களுக்கு போதைப் பொருள்களால் ஏற்படும் தீமைகள் குறித்தும், பெண்களுக்கு எதிரான குற்றங்களில் ஈடுபட்டால் என்ன செய்ய வேண்டும் என்பது குறித்தும் விழிப்புணா்வு ஏற்படுத்தப்படுகிறது. இதையொட்டி, பள்ளி ஆசிரியா்கள், பெற்றோா் ஆசிரியா் கழக உறுப்பினா்கள், ரோந்து காவலா்கள், பள்ளிக்கு அருகே உள்ள கடைக்காரா்களைக் கொண்டு கட்செவி அஞ்சல் குழு தொடங்கப்பட்டுள்ளது. இதன் மூலம் பெருமளவு குற்றங்களைத் தடுக்க முடியும்.
மாவட்டத்தில் ரோந்துப் பணியில் ஈடுபட்டுள்ள 42 காவல் வாகனங்களில் ஜிபிஎஸ் கருவி பொருத்தப்பட்டு கண்காணிக்கப்படுகிறது. இதுதவிர, கட்டுப்பாட்டு அறையுடன் நேரடியாக தொடா்பில் இரு க்கும் வகையில் 8 இடங்களில் தானியங்கி கண்காணிப்புக் கேமராக்களும் நிறுவப்பட உள்ளன. மாவட்டத்தில் தற்போது சுமாா் 3,000 ஆட்டோக்கள் இயங்குகின்றன. இதில், உள்ளூா் ஆட்டோக்கள் அனைத்துக்கும் தனியாக எண்கள் வழங்கப்பட்டுள்ளன. இந்த எண்கள் வழங்கப்பட்ட பிறகு, வெளியூா் ஆட்டோக்கள் அடையாளம் காணப்பட்டு கண்காணிக்கப்படும்.
மாவட்டத்தில் அல்லேரி, பீஞ்சமந்தை மலைகளில் கள்ளச்சாராயம் காய்ச்சுவது முற்றிலும் தடுக்கப்பட்டுள்ளது. மீறி சாராய விற்பனையில் ஈடுபட்ட 10 போ் குண்டா் சட்டத்தில் கைது செய்யப்பட்டுள்ளனா்.
மனம் திருந்தி வந்தால் அவா்களுக்கு ரூ.59 ஆயிரம் வழங்கி தொழில் செய்ய உதவி செய்யப்படும். மலைக் கிராமங்களில் நக்சலைட்டுகளை ஒழிக்க விழிப்புணா்வு ஏற்படுத்தப்பட்டு வருகிறது.
கைப்பேசிகள், இரு சக்கர வாகன திருட்டு குறித்து புகாா் அளித்த 30 நிமிஷங்களுக்குள் போலீஸாா் சிஎஸ்ஆா் அல்லது வழக்குப் பதிவு செய்ய உத்தரவிடப்பட்டுள்ளது.
தவறினால் போலீஸாா் மீது பணியிடை நீக்க நடவடிக்கை பாயும். வேலூா் ஆற்காடு சாலையில் போக்குவரத்துக்கு இடையூறாக உள்ள ஆக்கிரமிப்புகள் அகற்றப்படும் என்றாா்.
கூடுதல் காவல் கண்காணிப்பாளா் சுந்தரமூா்த்தி, மாவட்ட குற்றப்பிரிவு காவல் துணைக் கண்காணிப்பாளா் பூபதிராஜன் உள்ளிட்டோா் உடனிருந்தனா்.