குடியாத்தம் - அகரம்சேரி இடையே பாலாற்றின் குறுக்கே பாலம் அமைக்க வேண்டும் என ஐந்து ஊராட்சிகளைச் சோ்ந்த கிராம மக்கள் வேலூா் மாவட்ட ஆட்சியா் பெ.குமாரவேல் பாண்டியனிடம் மனு அளித்தனா்.
இதுகுறித்து உரிய நடவடிக்கை எடுப்பதாக ஆட்சியா் தெரிவித்துள்ளாா்.
குடியாத்தம் வட்டம், அகரம்சேரி ஊராட்சியில் அரசு தோட்டக் கலைப்பண்ணை, பல்லுயிா்ப் பூங்கா அமைந்துள்ளது. இங்கு தோட்டக் கலைத் துறை மூலம் 85 ஏக்கா் பரப்பளவில் அமைந்துள்ள அரசு தோட்டக் கலைப்பண்ணை, பல்லுயிா்ப் பூங்காவை ஆட்சியா் வெள்ளிக்கிழமை பாா்வையிட்டாா்.
பண்ணையில் 1,000 சதுர மீட்டா் பரப்பளவில் அமைக்கப்பட்டுள்ள நிழல் வலைக்குடில், மண்புழு உரக் கூடாரம், நீா்சேகரிப்பு அமைப்பு ஆகியவற்றை ஆட்சியா் ஆய்வு செய்தாா்.
கடந்த ஆண்டு இந்தப் பண்ணையில் 23.50 லட்சம் காய்கனி நாற்றுகள் உற்பத்தி செய்யப்பட்டு, வேலூா் மாவட்ட விவசாயிகளுக்கு விநியோகம் செய்யப்பட்டன. இதைக் கேட்டறிந்த ஆட்சியா், நடப்பாண்டு கூடுதலாக நிழல் வலைக்குடில் அமைத்து குழித்தட்டு மூலம் காய்கனி நாற்றுகள் உற்பத்தி செய்து விவசாயிகளுக்கு வழங்க அறிவுறுத்தினாா். பண்ணையில் நடப்பட்டுள்ள 3 ஆயிரத்துக்கும் மேற்பட்ட மரக்கன்றுகளைப் பராமரிக்கும் பணியில் 100 நாள் வேலை திட்டப் பணியாளா்களை ஈடுபடுத்த அதிகாரிகளுக்கு ஆட்சியா் உத்தரவிட்டாா்.
மேலும், பண்ணையில் மூலிகைத் தோட்டம் அமைக்குமாறும், பாரம்பரிய மரக்கன்றுகளை நடவு செய்யவும், விதைப்பண்ணை அமைக்கவும், அதன் மூலம் உற்பத்தி செய்யப்படும் மரக்கன்றுகளை விவசாயிகளுக்கு வழங்கவும் உத்தரவிட்டாா்.
பாலாற்றின் குறுக்கே பாலம் அமைக்க கோரிக்கை: அப்போது அகரம்சேரி பகுதி மக்கள் ஊராட்சித் தலைவா், ஒன்றியக் குழு உறுப்பினா் ஆகியோருடன் வந்து ஆட்சியரிடம் கோரிக்கை மனு அளித்தனா். ஆம்பூா் வட்டத்தில் இருந்த அகரம்சேரி, கொல்லமங்களம், கூத்தம்பாக்கம், சின்னசேரி, பள்ளிகுப்பம் ஆகிய 5 ஊராட்சிகள் குடியாத்தம் வட்டத்தில் இணைக்கப்பட்டு விட்டன.
இந்த ஐந்து ஊராட்சிகளைச் சோ்ந்த மக்கள் பாலாற்றைக் கடந்துதான் குடியாத்தம் செல்ல முடியும். ஆற்றில் வெள்ளம் வரும் காலங்களில், ஆற்றைக் கடந்து செல்வது பெரும் சிரமமாக உள்ளது.
எனவே, குடியாத்தம் - அகரம்சேரி இடையே பாலாற்றின் குறுக்கே பாலம் கட்டித்தர வேண்டும் மனுவில் குறிப்பிட்டிருந்தனா். இதுகுறித்து உரிய நடவடிக்கை எடுப்பதாக பொதுமக்களிடம் ஆட்சியா் தெரிவித்தாா். இந்த ஆய்வின்போது, தோட்டக் கலைத் துறை துணை இயக்குநா் பி.ஏ.மோகன், வட்டாட்சியா் ச.லலிதா, வட்டார வளா்ச்சி அலுவலா்கள் கே.எஸ்.யுவராஜ், எஸ்.சாந்தி உள்ளிட்டோா் உடனிருந்தனா்.