ஆட்சியா் அலுவலகத்தில் இரு முதியவா்கள் தீக்குளிக்க முயற்சி: குறைதீா் கூட்டத்தில் பரபரப்பு

வேலூா் மாவட்ட ஆட்சியா் அலுவலகத்தில் திங்கள்கிழமை நடைபெற்ற மக்கள் குறைதீா் கூட்டத்தின்போது, இரு முதியவா்கள் உடலில் மண்ணெண்ணெய்யை ஊற்றித் தீக்குளிக்க முயன்றனா்.

மாவட்ட ஆட்சியா் அலுவலகத்தில் மக்கள் குறைதீா் நாள் கூட்டம் ஆட்சியா் பெ.குமாரவேல் பாண்டியன் தலைமையில் திங்கள்கிழமை நடைபெற்றது. அப்போது, பென்னாத்தூா் அருகே உள்ள அல்லிவரம் கிராமத்தைச் சோ்ந்தவா் செல்வராஜ் (70), குறைதீா் கூட்டம் நடைபெறும் காயிதே மில்லத் அரங்கம் முன்பு திடீரென தான் கொண்டு வந்திருந்த மண்எண்ணெய்யை உடலில் ஊற்றிக் கொண்டு தீக்குளிக்க முயன்றாா்.

உடனடியாக அங்கிருந்த போலீஸாா் அவரை தடுத்து நிறுத்தி விசாரித்தனா். இதில், அல்லிவரம் கிராமத்தில் தனக்குச் சொந்தமான நிலத்தை அரசியல்வாதிகள் ஆக்கிரமிப்பு செய்வதாகவும், அவா்கள் மீது நடவடிக்கை எடுத்து நிலத்தை மீட்டு தர வேண்டும் என்றும் கூறினாா்.

இதேபோல், குடியாத்தம் அருகே உள்ள மோடிக்குப்பம் கிராமத்தைச் சோ்ந்த நாகரத்தினம் என்ற முதியவரும் ஆட்சியா் அலுவலக நுழைவு வாயிலில் தனது உடலில் மண்எண்ணெய்யை ஊற்றி தீக்குளிக்க முயன்றாா்.

அங்கிருந்த போலீஸாா் அவா் மீது தண்ணீரை ஊற்றி மீட்டனா். இதுகுறித்து நாகரத்தினம் கூறுகையில், மோடிக்குப்பம் கிராமத்தில் உள்ள நிலத்துக்கு பாதை இல்லாமல் அவதிப்படுகிறேன். நீண்ட நாள்களாக வழிப்பாதை கேட்டு மனு அளித்தும் நடவடிக்கை எடுக்கப்படவில்லை. அதனால் தீக்குளிக்க முயன்றேன் என்றாா்.

ஒரே நாளில் இரு முதியவா்கள் ஆட்சியா் அலுவலகத்தில் தீக்குளிக்க முயன்ற சம்பவம் பரபரப்பை ஏற்படுத்தியது. குறைதீா் கூட்டத்தில் வீட்டுமனைப் பட்டா, உதவித்தொகை உள்பட பல்வேறு கோரிக்கைகளை வலியுறுத்தி 359 மனுக்கள் பெறப்பட்டன.

மனுக்கள் மீது விரைவான நடவடிக்கை எடுக்கும்படி சம்பந்தப்பட்ட துறை அலுவலா்களுக்கு ஆட்சியா் உத்தரவிட்டாா்.

இதில், மாவட்ட வருவாய் அலுவலா் கே.ராமமூா்த்தி, ஊரக வளா்ச்சி முகமைத் திட்ட இயக்குநா் க.ஆா்த்தி, தனித் துணை ஆட்சியா் (சமூக பாதுகாப்புத் திட்டம்) தனஞ்செயன், அரசுத் துறைகள் சாா்ந்த அலுவலா்கள் கலந்து கொண்டனா்.