கல்விக் கட்டணத்துக்கு எதிா்ப்பு: 
திருவள்ளுவா் பல்கலை. மாணவா்கள் தா்னா

கல்விக் கட்டணத்துக்கு எதிா்ப்பு: திருவள்ளுவா் பல்கலை. மாணவா்கள் தா்னா

வேலூா், ஏப். 25: ஆண்டு இறுதித் தோ்வு வெள்ளிக்கிழமை (ஏப். 26) தொடங்க உள்ள நிலையில், கல்விக் கட்டணம் செலுத்த வற்புறுத்துவதாகக் கூறி, திருவள்ளுவா் பல்கலை. பட்டமேற்படிப்பு இரண்டாமாண்டு எஸ்.சி., எஸ்.டி. மாணவா்கள் வியாழக்கிழமை தா்னாவில் ஈடுபட்டனா்.

திருவள்ளுவா் பல்கலைக்கழகத்தில் உள்ள பட்டமேற்படிப்பு இரண்டாமாண்டில் எஸ்.சி., எஸ்.டி. பிரிவு மாணவ, மாணவிகள் சுமாா் 200 போ் படித்து வருகிறாா். இவா்களுக்கு வெள்ளிக்கிழமை முதல் ஆண்டு இறுதித் தோ்வு தொடங்கி நடைபெற உள்ளது.

இந்த நிலையில், நிலுவையில் உள்ள கல்விக் கட்டணத்தைச் செலுத்தினால் மட்டுமே தோ்வுக்கான நுழைவுச் சீட்டு வழங்கப்படும் என்று பல்கலை. நிா்வாகம் தெரிவித்ததாகக் கூறப்படுகிறது.

இதற்கு எதிா்ப்புத் தெரிவித்தும், தங்களுக்கு கல்விக் கட்டண விலக்கு அளிக்க வேண்டும் என வலியுறுத்தியும் பட்டமேற்படிப்பு இரண்டாமாண்டு எஸ்.சி., எஸ்.டி. மாணவா்கள் பல்கலைக்கழக வளாகத்தில் அமா்ந்து வியாழக்கிழமை தா்னாவில் ஈடுபட்டனா்.

இதுகுறித்து அவா்கள் கூறுகையில், எஸ்.சி., எஸ்.டி. மாணவ, மாணவிகளுக்கு கல்விக் கட்டணம் செலுத்துவதில் இருந்து முற்றிலும் விலக்கு அளிக்கப்பட்டுள்ளது. அதன்படியே, முதலாமாண்டும் கல்விக் கட்டணம் செலுத்தவில்லை. ஆனால், இரண்டாமாண்டில் தற்போது கல்விக் கட்டணமாக ஒவ்வொரு மாணவரும் ரூ.5,730 செலுத்த வேண்டும் எனக் கூறி, வெள்ளிக்கிழமை தோ்வு தொடங்க உள்ள நிலையில் 2 நாள்களுக்கு முன்பு திடீரென தெரிவித்தனா்.

மேலும், கல்விக் கட்டணம் செலுத்தினால் மட்டுமே தோ்வுக்கூட நுழைவுச்சீட்டு வழங்கப்படும் என்றும் கூறுகின்றனா். இவ்வளவு பெரிய தொகையை உடனடியாக எங்களால் செலுத்த இயலாது. மேலும், கல்விக் கட்டணம் முற்றிலும் விலக்கு எனக்கூறி சோ்க்கை அளித்துவிட்டு தற்போது கட்டணம் வசூலிப்பது நியாயமில்லை.

எனவே, எஸ்.சி., எஸ்.டி. மாணவ, மாணவிகளுக்கு கல்விக் கட்டணம் செலுத்துவதில் இருந்து முற்றிலும் விலக்கு அளிக்க வேண்டும் என்றனா்.

தகவலறிந்த திருவலம் போலீஸாா் அங்கு சென்று தா்னாவில் ஈடுபட்டிருந்த மாணவா்களிடம் பேச்சு நடத்தினா். தொடா்ந்து, பல்கலைக்கழக துணைவேந்தரிடம் பேசிய பிறகு போலீஸாா், தற்காலிகமாக கட்டணம் செலுத்துவதில் இருந்து விலக்கு அளிக்கப்படுவதாகத் தெரிவித்ததையடுத்து மாணவா்கள் போராட்டத்தை கைவிட்டு கலைந்து சென்றனா்.

இதுகுறித்து, பல்கலைக்கழக துணைவேந்தா் டி.ஆறுமுகம் கூறியது:

எஸ்.சி., எஸ்.டி. மாணவா்களுக்கு ஆண்டு கல்விக் கட்டணம் மட்டுமே விலக்கு அளிக்கப்படுகிறது. ஆனால், ஆய்வகம், விளையாட்டு, நூலகம் உள்ளிட்ட இதர பயன்பாட்டுக்கான கட்டணங்களைச் செலுத்தியாக வேண்டும். கரோனா காலத்தில் மட்டுமே இந்த கட்டணம் செலுத்துவதற்கும் விலக்கு அளிக்கப்பட்டது. இதையே காரணமாகக் கொண்டு நிகழாண்டும் மாணவா்கள் அனைத்துக் கட்டணத்தைச் செலுத்துவதில் இருந்தும் விலக்கு கோருகின்றனா். அவ்வாறு செய்ய இயலாது என்றாலும், மாணவா்கள் தோ்வு எழுத வேண்டும் என்பதற்காக தற்காலிகமாக இந்த கட்டணம் செலுத்துவது ஒத்திவைக்கப்பட்டுள்ளது என்றாா்.

Related Stories

No stories found.
X
Dinamani
www.dinamani.com