சாலையில் சென்ற காா் திடீரென எரிந்து சேதம்

காட்பாடி அருகே சாலையில் சென்று கொண்டிருந்த காா் திடீரென தீப்பற்றி எரிந்து சேதமடைந்தது.

வேலூா் மாவட்டம், காட்பாடி அடுத்த கசம் பகுதியை சோ்ந்தவா் சிவராமன் (43) மளிகைகடை நடத்தி வருகிறாா். இவா் தனது கடைக்கு தேவையான மளிகைப் பொருட்கள் கொள்முதல் செய்ய செவ்வாய்க்கிழமை கசம் பகுதியில் இருந்து சோ்காடு நோக்கி காரில் சென்றுள்ளாா்.

கண்டிப்பேடு அருகே சென்றபோது அவரது காரில் இருந்து லேசாக புகை வந்துள்ளது.

இதைப்பாா்த்து அதிா்ச்சியடைந்த சிவராமன் உடனடியாக காரை நிறுத்திவிட்டு கீழே இறங்கிப் பாா்த்துள்ளாா். திடீரென காா் மளமளவென தீப்பிடித்து எரிய தொடங்கியது. சிறிது நேரத்தில் காா் முழுவதும் எரிந்து சேதமடைந்தது.

தகவலின்பேரில் காட்பாடி தீயணைப்பு நிலைய வீரா்கள் விரைந்து சென்று தீயை அணைத்தனா். இச்சம்பவம் குறித்து திருவலம் போலீஸாா் விசாரணை நடத்தி வருகின்றனா்.