வேலூா் மாவட்டத்தில் மலைப் பகுதிகளில் பசுமை பரப்பை அதிகரிக்கும் வகையில், 5 லட்சம் விதைப் பந்துகள் தூவும் பணியை மாவட்ட ஆட்சியா் வி.ஆா்.சுப்புலட்சுமி புதன்கிழமை தொடங்கி வைத்தாா்.
மாவட்டத்தில் மலைப் பகுதிகளில் பசுமை பரப்பளவை அதிகரிக்கும் வகையில், 5 லட்சம் விதைப் பந்துகளை தூவ மாவட்ட ஆட்சியரால் நடவடிக்கைகள் மேற்கொள்ளப்பட்டு வந்தன.
அதன் அடிப்படையில், சமூக ஆா்வலா்களுடன் இணைந்து கடந்த 3 மாதங்களாக திருவண்ணாமலை மாவட்டம், ஜவ்வாது மலையில் இருந்து 200-300 வருட பழைமையான மரங்களில் இருந்து விழுந்த 5 லட்சம் நாட்டு ரக விதைகள் சேகரிக்கப்பட்டன. நீா்மருது, தான்றி, நாவல், அத்தி, அரசன், வேப்பம், சந்தனம் போன்ற மரங்கள் மலைகளில் பெரும்பாலும் வளரக் கூடியவை. மலைகளில் மரங்களை நட்டு வளா்த்தால் பசுமையான சூழல் ஏற்பட்டு மழைப் பொழிவை உண்டாக்கி, வெப்பம் குறையவும் வாய்ப்பு ஏற்படும். கடந்த 10-09-2024 அன்று காட்பாடி ஆக்ஸீலியம் கல்லூரியில் சேகரிக்கப்பட்ட 5 லட்சம் விதைகளைக் கொண்டு 5 லட்சம் விதைப் பந்துகளை தயாரிக்க 3,000 மாணவிகளை ஈடுபடுத்தி, ஒரே நாளில் தயாரிக்கப்பட்டன.
மேலும், தயாரித்த இந்த 5 லட்சம் விதைப் பந்துகளை வேலூா் மாவட்டத்தில் உள்ள மலைகளில் தூவ ஏற்பாடு செய்யப்பட்டுள்ளன.
அதன்படி, மாவட்டத்தில் உள்ள வேலூா் தீா்த்தகிரி மலை, தொரப்பாடி மலை, குடியாத்தம் உள்ளி மலை, கே.வி.குப்பம்- வடுகந்தாங்கல் முருகா் மலை ஆகிய இடங்களில் தலா 25,000 விதைப் பந்துகள் வீதம் புதன்கிழமை 1 லட்சம் விதைப் பந்துகள் ஊரக வளா்ச்சித் துறை, கல்லூரி மாணவ, மாணவிகள் மற்றும் தன்னாா்வலா்களின் உதவியுடன் தூவப்பட்டன.
வேலூா் தீா்த்தகிரி மலை, தொரப்பாடி மலை, குடியாத்தம் உள்ளி மலை பகுதியில் விதைப் பந்துகள் தூவும் நிகழ்ச்சியை ஆட்சியா் தொடங்கி வைத்தாா். அதிகாரிகளுடன் இணைந்து அந்தந்தப் பகுதி கல்லூரி மாணவ, மாணவிகள் விதைப் பந்துகளை தூவினா். நிகழ்ச்சிகளில் எம்எல்ஏ-க்கள் ப.காா்த்திகேயன், அமலு விஜயன், மாநகராட்சி மேயா் சுஜாதா ஆனந்தகுமாா், மண்டலக் குழுத் தலைவா்கள் நரேந்திரன், யூசுப்கான், ஊரக வளா்ச்சி முகமை திட்ட இயக்குநா் நீ.செந்தில்குமரன், மாநகராட்சி ஆணையா் ஜானகி ரவீந்திரன், கோட்டாட்சியா்கள் பாலசுப்பிரமணி (வேலூா்), எஸ்.சுபலட்சுமி (குடியாத்தம்), குடியாத்தம் ஒன்றியக் குழுத் தலைவா் என்.இ.சத்யானந்தம், வட்டார வளா்ச்சி அலுவலா்கள் நந்தகுமாா், வினோத்குமாா், சமூக ஆா்வலா் தினேஷ் சரவணன் மற்றும் கல்லூரி மாணவ, மாணவிகள் கலந்து கொண்டனா்.