சுடச்சுட

    

    திருப்பூர் மாவட்டத்திலுள்ள இடுவாய், வரலாற்றுச் சிறப்புமிக்க ஊர் என்பது தொல்லியல் ஆய்வில் உறுதிப்படுத்தப்பட்டுள்ளது.

    திருப்பூர் மாவட்டத்தில் உள்ள இடுவாய் என்ற கிராமத்தில் சிதிலமடைந்த நிலையில் இருந்த மாரியம்மன் ஆலயத்தைப் புனரமைக்கும் பணியில் இடுவாய், ஆட்டையாம்பாளையம், சின்னக்காளிபாளையம், சீரங்க கவுண்டம்பாளையம் பகுதி மக்கள் ஈடுபட்டனர்.

    இந்தப் பணியின்போது சில பொற்காசுகள் கண்டெடுக்கப்பட்டன. பழைய அம்மன் சிலையை அகற்றிவிட்டு புதிய அம்மன் சிலையை நிறுவும் முயற்சியில் திருப்பணிக் குழுவினர் ஈடுபட்டபோது, அம்மன் சிலை வைக்கப்பட்டிருந்த பீடத்தில் சில நாணயங்கள் கண்டெடுக்கப்பட்டன.

    இதுபற்றி வரலாற்று ஆர்வலர்கள் பல்லடம் பொன்னுசாமி, வேலுசாமி ஆகியோர் அளித்த தகவலின்பேரில் தொல்லியல் மற்றும் கல்வெட்டியல் பேராசியர் ச.ரவி ஆய்வு செய்தார். ஆய்வில் கண்டறியப்பட்ட விவரம்:

    இடுவாய் மாரியம்மன் ஆலயத்தில் நவரத்தினக் கற்கள் இரண்டும், வீரராயப் பொற்காசுகள் நான்கும், 16 பிரிட்டிஷ் நாணயங்கள் உள்ளிட்ட சில செப்பு நாணயங்களும் கண்டறியப்பட்டன. இத்துடன் யந்திரச் சக்கரம் வரையப்பட்ட செப்புத்தகடும் கண்டறியப்பட்டது.

    வீரராயப் பொற்காசு: அம்மன் சிலையின் கீழ் காணப்பட்ட நாணயங்களில் 4 பொற்காசுகள் முக்கியத்துவம் பெறுகின்றன. இவற்றை "வீரராயப் பொற்காசுகள்' என்று அழைப்பர்.

    இந்த நாணயங்களின் ஒரு பக்கம் உள்ள 12 புள்ளிகள் இட்ட குலுவைகள் 12 ராசிகளைக் குறிப்பதாகக் கூறுவர். பக்கத்தில் உள்ள கோட்டுருவம் வராக உருவத்தைக் குறிப்பதாகக் கூறுவர். இது விஜயநகர காலத்து வழக்கத்தைக் காட்டுகிறது. மற்றொரு பக்கம் வைஷ்ணவ குறியீடு போல நாமம் இருப்பதால் இதனை நாமக்காசு என்றும் அழைக்கின்றனர். அதன்மேல் சூரிய, சந்திரக் குறியீடுகளும் காணப்படுகின்றன. இப்பொற்காசுகள், திருவனந்தபுரம் வரையிலும் 17ஆம் நூற்றாண்டு முதல் மக்கள் மத்தியில் பெரும் செல்வாக்குப் பெற்ற காசுகளாக இருந்திருக்கின்றன.

    நத்தம்மேடு மற்றும் கரட்டுமேடு என்ற பகுதியை ஆய்வு செய்தபோது அப்பகுதி 3,000 ஆண்டுகளுக்கு முந்தைய சாம்பல்மேடு என்பது கண்டறியப்பட்டது.

    கொல்லன் தோட்டம் என்று அழைக்கப்படுகிற பகுதியில் இரும்புக் கசடுகள் ஏராளமாகக் கண்டறியப்பட்டன. இது இரும்புகாலப் பண்பாட்டை உறுதிப்படுத்துகிறது.

    இதே பகுதியில் மேலும் புதிய கற்கால மனிதர்கள் வாழ்ந்ததற்கான ஆதாரமாக அவர்கள் பயன்படுத்திய கற்களங்கள் பல சேகரிக்கப்பட்டன. இவற்றை புதிய கற்காலப் பண்பாட்டு மக்கள் வாழ்ந்ததற்கான தடயங்களாகக் கொள்ளலாம். அதன்பின் சிவப்பு மட்பாண்ட ஓடுகளும், தீப விளக்கும் கிடைத்திருப்பதன் மூலம் மட்கலத்தை உருவாக்கும் திறன்பெற்ற மட்கலப் பண்பாட்டு காலத்தை நினைவுப்படுத்துவதாகவும் அமைகிறது.

    அம்மன் சிலையும் பழைய கோவில் கட்டடமும் கொங்கு சோழர் காலத்தை நினைவுபடுத்துகின்றன. ஊரின் வடக்குப் பகுதியில் இருக்கும் சோதிக் கம்பமும், மங்கம்மா கிணறு என்று அழைக்கப்படுகிற தீர்த்தக் கிணறும், வீரராயப் பொற்காசும், பிரிட்டிஷ் நாணயங்களும், நாயக்கர் மற்றும் ஆங்கிலேயர் காலத்தை உறுதிப்படுத்தும் சான்றுகளாக அமைகின்றன.

    வரலாற்று காலத்தைய கால்நடை வளர்ப்பு சமுதாயம், புதிய கற்கால பண்பாடு, இரும்புக் காலப் பண்பாடு, மட்கலப் பண்பாடு காலம், இடைக்காலத்திய கொங்குச் சோழர் பண்பாடு, பிற்காலத்திய நாயக்க பிரிட்டிஷார் காலத்துப் பண்பாடு என நீண்ட நெடிய வரலாற்றுக் காலங்களை பிரதிபலிக்கின்ற முக்கிய வரலாற்று கிராமமாக இடுவாய் அமைந்திருப்பதை இவை உறுதிப்படுத்துகின்றன.

    Thirumana Porutham
    • அதிகம்
      படிக்கப்பட்டவை
    • அதிகம் இ-மெயில் செய்யப்பட்டவை
    google_play app_store
    kattana sevai