யானைகள் கணக்கெடுப்பு தொடக்கம்

ஆனைமலை புலிகள் காப்பகத்தில் யானைகள் கணக்கெடுக்கும் பணி புதன்கிழமை தொடங்கியது. தொடர்ந்து 3 நாள்களுக்கு யானைகள் கணக்கெடுக்கும் பணி நடைபெறும்.
பொள்ளாச்சி, உலாந்தி, வால்பாறை, மானாம்பள்ளி, உடுமலை, அமராவதி ஆகிய 6 வனச் சரகங்களிலும் 58 வட்டங்கள் உருவாக்கப்பட்டு, 58 குழுக்கள் இக்கணக்கெடுப்பில் ஈடுபட்டுள்ளன.
ஒரு வட்டத்துக்கு சராசரியாக 500 ஹெக்டேர் வரை ஒதுக்கப்பட்டுள்ளது.
இதில், ஒவ்வொரு குழுவுக்கும் ஒதுக்கப்பட்டுள்ள வட்டத்தில் புதன்கிழமை பரவலாகச் சென்று யானைகளை நேரில் பார்க்கும் முறையும், 2-ஆவது நாளாக வியாழக்கிழமை நேர்கோட்டுப் பாதையில் 1 கி.மீ. தொலைவுக்கு ஒவ்வொரு 50 மீட்டர் தூரத்திலும் உள்ள யானைகளின் கழிவுகளை கணக்கெடுக்கும் பணியும் நடைபெறும்.
மேட்டுப்பாளையம்:
மேட்டுப்பாளையம் வனச் சரகத்துக்கு உள்பட்ட மரக்கிடங்கு வளாகம் அருகே உள்ள வனப் பகுதியில் யானைகள் கணக்கெடுக்கும் பணி தொடங்கியது.
இதில், வனச் சரகர் நசீர் உள்ளிட்ட வனத் துறையினரும், இயற்கை ஆர்வலர்களும் பங்கேற்றனர். 3 குழுக்களாக பிரிந்து, வனப் பகுதிக்குள் சென்று யானைகள் குறித்த கணக்கெடுப்பை அவர்கள் மேற்கொண்டனர்.
சிறுமுகை:
கோத்தகிரி சாலையை அடுத்த சிறுமுகை வனச் சரகத்தில் யானைகள் கணக்கெடுக்கும் பணி நடைபெற்றது. வனச் சரகர் மனோகரன் தலைமையில், வனவர் ராதாகிருஷ்ணன், வனக் காப்பாளர்கள் ஜித்தன், தங்கராஜ், வேட்டைத் தடுப்புக் காவலர்கள், தன்னார்வலர்கள் இக்கணக்கெடுப்புப் பணியில் ஈடுபட்டனர்.