Enable Javscript for better performance
கோவை மாநகராட்சி நிதிநிலை அறிக்கை தாக்கல்: ரூ. 17.74 கோடி உபரி நிதி: பில்லூர் 3-ஆவது குடிநீர்த் திட்ட- Dinamani

சுடச்சுட

    

    கோவை மாநகராட்சி நிதிநிலை அறிக்கை தாக்கல்: ரூ. 17.74 கோடி உபரி நிதி: பில்லூர் 3-ஆவது குடிநீர்த் திட்டத்துக்கு முதல்கட்டமாக ரூ. 20 கோடி ஒதுக்கீடு

    By DIN  |   Published on : 24th March 2018 02:50 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    கோவை மாநகராட்சியில் இரண்டாவது ஆண்டாக ரூ. 17.74 கோடி உபரி நிதிநிலை அறிக்கை வெள்ளிக்கிழமை தாக்கல் செய்யப்பட்டது. இதில், பில்லூர் 3-ஆவது குடிநீர்த் திட்டத்துக்கு முதல்கட்டமாக ரூ. 20 கோடி ஒதுக்கீடு செய்யப்பட்டுள்ளது.
    கோவை மாநகராட்சி ஆணையரும், தனி அலுவலருமான க.விஜயகார்த்திகேயன், 2018-19-ஆம் ஆண்டுக்கான நிதிநிலை அறிக்கையை வெள்ளிக்கிழமை தாக்கல் செய்தார்.
    இரண்டாவது ஆண்டாக உபரி நிதிநிலை அறிக்கை: கோவை மாநகராட்சியின் மொத்த வருவாய் மூலதன வரவு ரூ. 1,274.91 கோடியாகவும், மூலதனச் செலவாக ரூ. 1,257.17 கோடியும் மதிப்பீடு செய்யப்பட்டுள்ளது. இதனால் 2018-19-ஆம் ஆண்டில் நிகர உபரி நிதியாக ரூ. 17.74 கோடி மதிப்பீடு செய்யப்பட்டுள்ளது.
    இதேபோல கடந்த 2017-18-ஆம் ஆண்டில் தாக்கல் செய்த நிதிநிலை அறிக்கையில் நிகர உபரியாக ரூ. 13.04 கோடி அறிவிக்கப்பட்டது குறிப்பிடத்தக்கது.
    கோவை மாநகராட்சியில் வரிவருவாய் மூலதன வரவுகள் தவிர நிலுவையில் உள்ள சொத்து, குடிநீர் வடிகால் வரி, மத்திய, மாநில அரசுகள் அளிக்கும் மாநில நிதியும் மாநகராட்சி வருவாயில் இணைக்கப்பட்டுள்ளது. இந்த நடைமுறைத் திட்டத்தின்படி எதிர்காலத்தில் கிடைக்கப்பெறும் வருவாயைக் கணக்கில் கொண்டுதான் ரூ. 17.74 கோடி உபரி நிதிநிலை அறிக்கை தயார் செய்யப்பட்டுள்ளது.
    பில்லூர் 3-ஆவது குடிநீர்த் திட்டத்துக்கு ரூ. 20 கோடி ஒதுக்கீடு:
    கோவை மாநகரில் வரும் 2050-ஆம் ஆண்டு மக்கள் தொகை கணக்கீட்டின்படி பில்லூர் 3- ஆவது குடிநீர்த் திட்டத்துக்கு ரூ. 1,018 கோடி மதிப்பீடு செய்யப்பட்டுள்ளது. இதன்படி மாநகரின் குடிநீர்த் தேவை 565.65 மில்லியன் லிட்டர் என்று கணக்கிடப்பட்டுள்ளது.
    இதற்காக பில்லூர் அணையில் இருந்து தண்ணீர் எடுக்கப்பட உள்ளது. இந்தத் திட்டத்துக்காக சுமார் 174 ஏக்கர் நிலம் கையகப்படுத்தப்பட உள்ளது. இதில், பில்லூர் அணையில் இருந்து 53.36 கிலோ மீட்டருக்கு பகிர்மானக் குழாய்கள் பதிக்கவும், 4 கிலோ மீட்டருக்கு டானல் குழாய் பதிக்கவும், 150 எம்எல்டி கொள்ளளவு கொண்ட குடிநீர் சுத்திகரிப்பு மையமும் அமைக்கப்பட உள்ளது.
    இதற்காக நிலத்தை ஆர்ஜிதப்படுத்தவும், அதற்கான ஒப்புதல் கடிதங்களைப் பெறவும் மாவட்ட வருவாய்த் துறையினருடன் இணைந்து பணிகள் மேற்கொள்ளப்பட்டு வருகின்றன. இதற்காக தற்போது நிலம் கையகப்படுத்துவதற்காக முதல் கட்டமாக ரூ. 20 கோடி நிதி ஒதுக்கீடு செய்யப்பட்டுள்ளது. மேலும் மாநில அரசின் மானியத் தொகை ரூ. 30 கோடியைப் பெறவும் நடவடிக்கைகள் மேற்கொள்ளப்பட்டு வருகிறது.
    காற்றின் தரம் மற்றும் அரசின் திட்டங்கள் குறித்த விளம்பரப் பலகைகள்: பொலிவுறு நகரம் திட்டத்தின் கீழ் காற்றின் தரம் குறித்து கண்காணிப்புக் கருவி மூலமாகப் பெறப்படும் தகவல்களை பொது மக்களுக்கு தெரிவிக்கும் வகையில் கணினி அறிவிப்புப் பலகைகள் தனியார் பங்களிப்புடன் 30 இடங்களில் செயல்படுத்துவதற்கான பணிகள் தொடங்கப்பட்டுள்ளன. இதில், தனியார் விளம்பரங்களை வெளியிடும் வகையில் இத்திட்டம் செயல்படுத்தப்பட்டு மாநகராட்சிக்கு வருவாய் ஈட்டப்படும். மேலும், மாநகராட்சியின் சுகாதார விழிப்புணர்வு மற்றும் பொது மக்களுக்கான அறிவிப்புகளும் வெளியிடப்படும்.
    மாதிரிச் சாலைக்கு ரூ. 25 கோடியில் திட்ட அறிக்கை: கோவை ஆர்.எஸ்.புரம் டி.பி.சாலையில் மாதிரி சாலை அமைக்க ரூ.25 கோடி மதிப்பீட்டில் விரிவான திட்ட அறிக்க தயார் செய்யப்பட்டு மார்ச் 2-ஆம் தேதி அரசின் உயர் மட்டக்குழு ஒப்புதலுக்கு அனுப்பப்பட்டுள்ளது. இதில், கீழ் நடைபாதை, இயந்திரமில்லாத வாகனப் போக்குவரத்து ஆகியவற்றுக்கு முக்கியத்துவம் அளிக்கும் வகையில் சாலைகள் வடிவமைக்கப்பட்டிருப்பது குறிப்பிடத்தக்கது.
    சாலைகளில் சூரிய சக்தி மின்விளக்குகள், பொது மக்கள் அமர்வதற்கான இருக்கைகள், பசுமைப் பகுதிகள், மேம்படுத்தப்பட்ட வாகனம் நிறுத்தும் இடம் ஆகியவையும் அமைக்கப்பட உள்ளது. அதைத் தொடர்ந்து, ரேஸ்கோர்ஸ், என்.எஸ்.ஆர். சாலை உள்ளிட்ட சில இடங்களில் மாதிரிச் சாலைகள் அமைக்கப்படும்.
    பொலிவுறு நகரம் திட்டத்தில் வெள்ளலூர் பேருந்து நிலையம்: கடந்த ஆண்டு மற்றும் நிகழாண்டு நிதிநிலை அறிக்கையிலும் வெள்ளலூர் ஒருங்கிணைந்த பேருந்து நிலையம், பன்னடுக்கு இருசக்கர வாகன நிறுத்துமிடம் போன்ற திட்டங்களுக்கான அறிக்கைகள் தயார் செய்யப்பட்டுள்ளன. அதிலும், வெள்ளலூர் பேருந்து நிலையம் தற்போது ரூ. 236.17 கோடி மதிப்பீட்டில் பொலிவுறு நகரம் திட்டத்தின் கீழ் செயல்படுத்தப்படவுள்ளது.
    பல அடுக்கு வாகன நிறுத்தம் திட்டத்துக்கு புதிய ஒப்பந்தப்புள்ளி: கோவை மாநகராட்சியில் காந்திபுரம் கிராஸ்கட் சாலை, ஆர்.எஸ்.புரம், டி.பி.சாலை மற்றும் டவுன்ஹால் ஆகிய நான்கு இடங்களில் போக்குவரத்து நெரிசலைக் குறைக்கும் வகையில் வணிக வளாகங்களுடன் கூடிய அடுக்குமாடி வாகனங்கள் நிறுத்துமிடம் அமைக்கத் திட்டமிடப்பட்டது.
    இதற்கான ஒப்பந்தப் புள்ளியில் பங்கேற்ற இரு தனியார் நிறுவனகளும் தொழில்நுட்பத் தகுதி பெறவில்லை. ஆகவே, தனியாருடன், மாநகராட்சியும் இணைந்து பணிகளை மேற்கொள்ள நிதி ஒதுக்கவும் திட்டமிடப்பட்டுள்ளது. இதனிடையே பொலிவுறு நகரம் திட்டத்தின்கீழ் ரூ. 77 கோடி மதிப்பீட்டில் வணிக வளாகங்களுடன் கூடிய அடுக்குமாடி வாகன நிறுத்துமிடங்கள் அமைக்கத் திட்ட அறிக்கைத் தயார் செய்யப்பட்டுள்ளது.
    பொலிவுறு நகரம் திட்டத்தில் 8 குளங்களை மேம்படுத்த நிதி ஒதுக்கீடு: கோவை மாநகரில் பொலிவுறு நகரம் திட்டத்தின் கீழ் 8 குளங்களைப் புனரமைத்து மேம்பாடு செய்தல், மோட்டார் பயன்பாடு இல்லாத பாதை அமைக்க நிதிநிலை அறிக்கையில் நிதி ஒதுக்கீடு செய்யப்பட்டுள்ளது. இதில், முதல்கட்டமாக பெரியகுளம் நடைபாதை அமைக்க ரூ. 39.74 கோடியும், வாலாங்குளம் நடைபாதை (வடக்கு) ரூ. 24.31 கோடியும், வாலாங்குளம் (மேம்பாலத்தின்கீழ்) ரூ. 23.83 என மொத்தம் ரூ. 87.88 கோடி நிதி ஒதுக்கீடு செய்யப்பட்டுள்ளது. இதற்கான ஒப்பந்தப் புள்ளிகள் விரைவில் தொடங்கப்படும். இத்திட்டத்தின் கீழ் பொழுதுபோக்கு அம்சங்கள் நிறைந்த பூங்காக்கள், யோக மையம், உடற்பயிற்சிக் கூடம், துரித உணவகங்கள், நவீன கழிப்பிடம் போன்ற பல்வேறு சிறப்பு அம்சங்கள் இடம்பெறும்.
    ஸ்மார்ட் பள்ளிகள் அமைக்க ரூ. 27.51 கோடி: கோவை பொலிவுறு நகரம் திட்டத்தின் கீழ் 14 வார்டுகளில் 22 மாநகராட்சிப் பள்ளிகளில் தற்போது 5 பள்ளிகளை ஸ்மார்ட் பள்ளிகளாக மாற்றுவதற்கு ரூ. 27.51 கோடி ஒதுக்கப்பட்டுள்ளது. இதில், சர் சி.வி. ராமன் சாலையில் உள்ள மாநகராட்சி ஆரம்பப் பள்ளி, கிழக்கு ஆரோக்கியசாமி சாலையில் உள்ள பி.வி.பி. ஆரம்பப் பள்ளி, மேற்கு சம்பந்தம் சாலையில் உள்ள மாநகராட்சிப் பெண்கள் மேல்நிலைப் பள்ளி, மேற்கு ஆரோக்கியசாமி சாலையில் உள்ள மாநகராட்சிப் பெண்கள் மேல்நிலைப் பள்ளி, சுப்பிரமணியம் சாலையில் உள்ள மாநகராட்சி காதுகேளாதோர் பள்ளி ஆகியவை அடங்கும்.
    காய்கறி மார்க்கெட்டை இடமாற்றத் திட்டம்: கோவை, மேட்டுப்பாளையம் சாலையில் செயல்பட்டு வரும் எம்.ஜி.ஆர்.காய்கறி மார்க்கெட் 3 ஏக்கர் பரப்பளவில் உள்ளது. இதில், தற்போது 112 கடைகள் செயல்பட்டு வருகின்றன. இப்பகுதியில் அதிகரித்து வரும் வாகனங்களால் கடுமையான போக்குவரத்து நெரிசல் ஏற்பட்டுள்ளது. எனவே, மேட்டுப்பாளையம் சாலையில் உரக்கிடங்கு வளாகத்தில் 12 ஏக்கர் பரப்பளவில் பொலிவுறு நகரம் திட்டத்தில் இருந்து ரூ.20 கோடி நிதியில் கூடுதல் எண்ணிக்கையிலான கடைகள், வாகன நிறுத்துமிடம் கட்டத் தேவையான நடவடிக்கைகள் மேற்கொள்ளப்பட்டு வருகின்றன.
    வெள்ளலூர் குப்பை கிடங்கை கண்காணிக்க ரூ. 40 லட்சம் செலவில் ஆளில்லா விமானம்: கோவை வெள்ளலூர் மாநகராட்சி குப்பைக் கிடங்கில் அடிக்கடி தீ விபத்து ஏற்படுகிறது. ஆகவே, இந்தக் கிடங்குக்குள் சமூக விரோதிகள் நுழைவதைக் கண்காணிக்கும் வகையில் ரூ. 40 லட்சம் செலவில் ஆளில்லா விமானம் வாங்கவும் நிதி ஒதுக்கீடு செய்யப்பட்டுள்ளது.
    புதிய திட்டங்கள் இல்லாதது ஏமாற்றமே: வெள்ளலூர் ஒருங்கிணைந்த பேருந்து நிலையம், பன்னடுக்கு வாகனம் நிறுத்துமிடம், ஹாக்கி விளையாட்டு மைதானம், 24 மணி நேரக் குடிநீர், குளங்கள் சீரமைப்பு போன்ற திட்டங்கள் ஒவ்வொரு ஆண்டும் நிதிநிலை அறிக்கையில் இடம் பெற்று வருகின்றன. அதே வேளையில், பெரிய திட்டங்கள் எதுவும் இல்லாததும், ஒரு சில திட்டங்களுக்குத் தொடர்ந்து நிதி ஒதுக்கியும் பல்வேறு காரணங்களால் நிறைவேற்றப்படாததும் பெரிய அதிருப்தியை ஏற்படுத்தியுள்ளது.
    அரசிடம் இருந்து ரூ. 36 கோடி நிதி
    நிதிநிலை அறிக்கை குறித்து கோவை மாநகராட்சி அதிகாரிகள் கூறியதாவது: சங்கனூர் பள்ளத்தின் கரையோரங்களை பலப்படுத்திச் சீரமைத்து, கரைகளின் இருபுறமும் நடைபாதைகள் அமைக்கவும் ரூ. 190 கோடியில் திட்ட அறிக்கைத் தயார் செய்யப்பட்டுள்ளது.
    இந்தப் பள்ளமானது மேட்டுப்பாளையம் சாலையில் இருந்து சிங்காநல்லூர் வரை 10 கி.மீ. தூரம் கொண்டது. எனவே, இதை இருபகுதிகளாகப் பிரித்துச் சீரமைப்புப் பணிகளை மேற்கொள்ளவும் திட்டமிட்டப்பட்டுள்ளது.
    நாள்தோறும் ரூ. 2 கோடி வரிவசூல்: கோவை மாநகராட்சிக்கு சொத்துவரி, தொழில் வரி, குடிநீர் வரி என பல்வேறு விதமான வரியினங்களில் இருந்து நாள்தோறும் ரூ. 2 கோடி வரி வசூலிக்கப்படுகிறது. மேலும், கோவை மாநகராட்சிக்குப் பல்வேறு திட்டங்களுக்கு மானியமாக மாநில அரசிடம் இருந்து 2 நாள்களுக்கு முன்னர் ரூ. 36 கோடி நிதி வந்துள்ளது. மாநகராட்சியில் தற்போது நிதியும் சீராக உள்ளததால் உபரி நிதிநிலை அறிக்கை இரண்டாவது ஆண்டாகத் தாக்கல் செய்யப்பட்டுள்ளது என்றனர்.

     

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai