ஜெயலலிதா பிறந்த நாள் விழா: சிலைக்கு மாலை அணிவித்து அதிமுகவினர் மரியாதை

மறைந்த முன்னாள் முதல்வர் ஜெயலலிதாவின் பிறந்த நாளை முன்னிட்டு அதிமுகவினர் அவரது சிலைக்கு மாலை அணிவித்து ஞாயிற்றுக்கிழமை மரியாதை செலுத்தினர்.
 கோவை மாநகர் மாவட்ட அதிமுக சார்பில் மறைந்த முதல்வர் ஜெயலலிதாவின் 71ஆவது பிறந்த நாள் விழா கோவையில் ஞாயிற்றுக்கிழமை கொண்டாடப்பட்டது. 
விழாவை முன்னிட்டு அதிமுக மாநகர் மாவட்டச் செயலாரும், சட்டப்பேரவை உறுப்பினருமான பி.ஆர்.ஜி.அருண்குமார் தலைமையில் மாவட்டத் தலைமை அலுவலகத்தில் இருந்து ஊர்வலமாக வந்த அக்கட்சியினர் அவிநாசி சாலையில் உள்ள ஜெயலலிதாவின் சிலைக்கு மாலை அணிவித்து மரியாதை செலுத்தினர்.
 பின்னர் கட்சி அலுவலகத்தில் வைக்கப்பட்டிருந்த ஜெயலலிதாவின் உருவப்படத்துக்கு மலர்தூவி மரியாதை செலுத்தினர். பின்னர் அலுவலக வளாகத்தில் கட்சிக் கொடியை ஏற்றி தொண்டர்களுக்கும், பொதுமக்களுக்கும் இனிப்புகள் வழங்கினர்.
 இதில் எம்எல்ஏக்கள் அம்மன் அர்ச்சுணன், ஆறுகுட்டி, முன்னாள் அமைச்சர்கள் செ.மா.வேலுச்சாமி, பா.வ.தாமோதரன், கோவை புறநகர் மாவட்ட எம்ஜிஆர் இளைஞரணிச் செயலாளர் இ.ஆர்.சந்திரசேகர், முன்னாள் மண்டலத் தலைவர் ஆதிநாராயணன், முன்னாள் கவுன்சிலர்கள் டி.ஜெ.செல்வகுமார், எஸ்.ஜெ.அசோக்குமார், இளைஞரணி இணைச் செயலர் பப்பாயா ராஜேஷ், மாணவரணித் தலைவர் கமலக்கண்ணன், மாவட்ட எம்ஜிஆர் இளைஞரணித் துணைத் தலைவர் கே.எம்.பாலமுரளி உள்ளிட்ட கட்சி நிர்வாகிகள் பலர் கலந்துகொண்டனர்.
 கோவை தெற்கு தொகுதி சட்டப்பேரவை உறுப்பினர் அலுவலகத்தில் நடந்த பிறந்தநாள் விழாவில் ஜெயலலிதாவின் உருவப்படத்துக்கு சட்டப்பேரவை உறுப்பினர் அம்மன் கே.அர்ச்சுணன் மலர்தூவி மரியாதை செலுத்தினார். பின்னர் பொதுமக்களுக்கு இனிப்பு வழங்கினர். இதில் கட்சி நிர்வாகிகள் பலர் கலந்துகொண்டனர்.