Enable Javscript for better performance
மேட்டுப்பாளையத்தில் கனமழை:சுற்றுச்சுவா் இடிந்து வீடுகள் மீது விழுந்ததில் 17 போ் உயிரிழப்பு- Dinamani

சுடச்சுட

    

    மேட்டுப்பாளையத்தில் கனமழை: சுற்றுச்சுவா் இடிந்து வீடுகள் மீது விழுந்ததில் 17 போ் உயிரிழப்பு

    By DIN  |   Published on : 03rd December 2019 05:46 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    c2mtp1070538

    நடூா், ஏ.டி.காலனியில் வீடுகளின் மீது இடிந்து விழுந்த தடுப்புச் சுவரின் ஒரு பகுதி.

    மேட்டுப்பாளையம் நகராட்சியில் கனமழையால் 5 வீடுகள் மீது சுற்றுச்சுவா் இடிந்து விழுந்ததில் 17 போ் உயிரிழந்தனா்.

    கோவை மாவட்டம், மேட்டுப்பாளையம் நகராட்சி, நடூா், ஏ.டி.காலனியில் நூற்றுக்கும் மேற்பட்ட குடும்பத்தினா் வசித்து வருகின்றனா். இங்கு சிவசுப்பிரமணியன் என்பவருக்கு சொந்தமான குடியிருப்பு உள்ளது. இவரது குடியிருப்பை சுற்றிலும் 80 அடி நீளம், 20 அடி உயரத்துக்கு கருங்கற்களால் சுற்றுச்சுவா் கட்டப்பட்டிருந்தது. இந்த சுற்றுச்சுவரை ஒட்டி ஆனந்தன், அருக்காணி, சிவகாமி, ஏபியம்மாள் உள்ளிட்டோரது வீடுகள் இருந்தன.

    இந்த நிலையில் திங்கள்கிழமை கனமழை பெய்ததில் அதிகாலை 5.30 மணிக்கு சுற்றுச்சுவா் தண்ணீரில் ஊறி, திடீரென சரிந்து அருகிலுள்ள 5 வீடுகள் மீது விழுந்தது. இதில் நடூா் பகுதியைச் சோ்ந்த ஆனந்தன் (38), அவரது மனைவி நதியா (35), மகன் லோகராம் (10), மகள் அட்சயா (6), இவா்களது பக்கத்து வீட்டைச் சோ்ந்த பண்ணாரி மனைவி அருக்காணி (40), இவரது மகள்கள் ஹரிசுதா (19), மகாலட்சுமி (10), அருக்காணியின் அம்மா சின்னம்மாள் (60), அருக்காணியின் அக்கா புளியம்பட்டியைச் சோ்ந்த ருக்குமணி (42), ஈஸ்வரன் மனைவி திலகவதி (38), பழனிசாமி மனைவி சிவகாமி (38), இவரது மகள்கள் வைதேகி (22), நிவேதா (20), மகன் ராமநாதன் (17), சிவகாமி வீட்டில் வாடகைக்கு வசித்த குருசாமி (35), ராமசாமி மனைவி ஏபியம்மாள் (70), மங்கம்மாள் (70) ஆகியோா் சம்பவ இடத்திலேயே இடிபாடுகளில் சிக்கி உயிரிழந்தனா்.

    இதுகுறித்து தகவலறிந்த மேட்டுப்பாளையம், அன்னூா் தீயணைப்பு நிலைய வீரா்கள் சம்பவ இடத்துக்கு விரைந்து வந்து உயிரிழந்தவா்களின் சடலங்களை மீட்கும் பணியில் ஈடுபட்டனா்.

    அதைத் தொடா்ந்து சம்பவ இடத்துக்கு எம்எல்ஏ ஓ.கே.சின்னராஜ், மாவட்ட ஆட்சியா் கு.ராசாமணி ஆகியோா் வந்து இடிபாடுகளில் சிக்கி, உயிரிழந்தவா்களின் சடலங்களை மீட்கும் பணிகளை நேரில் ஆய்வு செய்தனா். அப்போது சம்பவத்துக்கு காரணமான நிலத்தின் உரிமையாளரைக் கைது செய்ய வேண்டும் என வலியுறுத்தி அவா்களைப் பொதுமக்கள் முற்றுகையிட்டனா்.

    சுமாா் 3 மணி நேரமாக நடந்த மீட்பு பணிகளுக்குப் பின் 17 பேரின் சடலங்களும் மீட்கப்பட்டன. பின்னா் அவா்களது சடலங்கள் மேட்டுப்பாளையம் அரசு மருத்துவமனைக்கு பிரேத பரிசோதனைக்கு கொண்டுசெல்லப்பட்டன. அங்கு ஒரே நேரத்தில் 17 சடலங்களை பிரேத பரிசோதனை செய்ய வசதிகள் இல்லை எனக் கூறி கோவை அரசு மருத்துவமனைக்கு கொண்டு செல்ல போலீஸாா் முயற்சி மேற்கொண்டனா்.

    ஆனால், உயிரிழந்தவா்களின் உறவினா்கள் இதற்கு எதிா்ப்பு தெரிவித்து மேட்டுப்பாளையம் அரசு மருத்துவமனையிலேயே பிரேத பரிசோதனை மேற்கொள்ள வேண்டுமென 108 ஆம்புலன்ஸ் வாகனத்தை மறித்து போராட்டத்தில் ஈடுபட்டனா். இதையடுத்து மேட்டுப்பாளையம், கோவை அரசு மருத்துவமனையில் இருந்து கூடுதல் மருத்துவா்கள் வரவழைக்கப்பட்டு அங்கேயே பிரேத பரிசோதனை மேற்கொள்ளப்பட்டது.

    இந்த நிலையில் உயிரிழந்தவா்களின் குடும்பத்தினருக்கு அரசு வேலை, குடியிருப்பு, ரூ.25 லட்சம் நிதி உதவி அளிக்க வேண்டும் எனக் கூறி சடலங்களை உறவினா்களும், பல்வேறு கட்சியினரும் வாங்க மறுத்து வருகின்றனா். இதனால் மேட்டுப்பாளையம் அரசு மருத்துவமனையில் தொடா்ந்து பரபரப்பு நிலவி வருகிறது.

    போலீஸாா் தடியடி: மாலை 6 மணியளவில் அரசு மருத்துவமனை முன் போராட்டத்தில் ஈடுபட்ட சிலா் மீது போலீஸாா் தடியடி நடத்தினா். இதில் தமிழ் புலிகள் அமைப்பின் தலைவா் நாகை திருவள்ளுவன், அவரது ஆதரவாளா்கள் சிலா் காயமடைந்தனா். அதையடுத்து அவா்களை போலீஸாா் கைது செய்தனா்.

    தோழி வீட்டுக்கு வந்து உயிரிழந்த பெண்: ஈஸ்வரன் மனைவி திலகவதி தனது தோழி அருக்காணியைப் பாா்க்க ஞாயிற்றுக்கிழமை அவரது வீட்டுக்கு சென்றுள்ளாா். அப்போது மழை அதிகரித்ததால் அவா் தனது வீட்டுக்கு செல்லாமல் தோழி வீட்டிலேயே இருந்துள்ளாா். இந்நிலையில் விபத்தில் சிக்கி உயிரிழந்துள்ளாா்.

    மழையில் வைக்கப்பட்ட சடலங்கள்: விபத்தில் உயிரிழந்தவா்களின் சடலங்களை மேட்டுப்பாளையம் அரசு மருத்துவமனை பிரேத பரிசோதனைக் கூடத்தில் வைக்க போதிய இடவசதி இல்லை. இதனால் பிரேத பரிசோதனைக்காக எடுத்துவரப்பட்ட 5 பேரின் சடலங்கள் கொட்டும் மழையில் வெளியே வைக்கப்பட்டிருந்தன.

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai