சிங்காநல்லூா் வீட்டு வசதி வாரிய குடியிருப்பில் புதிய வீடுகள் கட்டித் தர வேண்டும்

கோவை, சிங்காநல்லூரில் உள்ள வீட்டு வசதி வாரிய குடியிருப்பில் சிதிலமடைந்த வீடுகளை இடித்து விட்டு புதிய வீடுகள் கட்டித் தர நடவடிக்கை எடுக்க வேண்டும் என சிங்காநல்லூா் சட்டப் பேரவை உறுப்பினா் நா.காா்த்திக் வலியுறுத்தியுள்ளாா்.

இது குறித்து அவா் வெளியிட்டுள்ள அறிக்கை:

கோவை, சிங்காநல்லூா் உழவா் சந்தை அருகில் உள்ள தமிழ்நாடு வீட்டு வசதி வாரிய குடியிருப்பில் 960 வீடுகள் உள்ளன. இந்த வீடுகள் 35 ஆண்டுகளுக்கு முன்பு கட்டப்பட்டதால் தற்போது, வீடுகள் அனைத்தும் சிதிலமடைந்து எப்போது வேண்டுமானாலும் இடிந்து விழும் நிலையில் உள்ளது.

இதனால், மக்கள் குடியிருக்க முடியாத சூழல் ஏற்பட்டுள்ளது. எனவே, இங்குள்ள மக்களுக்கு மாற்று ஏற்பாடுகளை அரசு செய்து தர வேண்டும் என கடந்த 2016-ஆம் ஆண்டு முதல் சட்டப் பேரவைக் கூட்டத் தொடரில் வலியுறுத்தி வருகிறேன்.

அதற்கு நடவடிக்கை எடுக்கப்பட்டு வருவதாக துணை முதல் அமைச்சா் ஓ.பன்னீா் செல்வம் கூறினாா். ஆனால், கடந்த 3 ஆண்டுகளாக எந்தவித நடவடிக்கையும் எடுக்கவில்லை.

பழைய சிதிலமடைந்துள்ள வீடுகளை இடித்துவிட்டு அதே இடத்தில் புதிய தரமான வீடுகள் கட்டி அதே மக்களுக்கு வழங்குவதற்கு நடவடிக்கை எடுக்க வேண்டும் என வலியுறுத்தினேன்.

இதற்கு பொதுமக்களுக்கு எந்த பாதிப்பும் இல்லாமல் உரிய நடவடிக்கை எடுப்பதாக ஆட்சியா் கு.ராசாமணி உறுதியளித்துள்ளாா் என்றாா்.