மனோகரனின் தூக்கு தண்டனையை ரத்து செய்யக்கோரி குடியரசுத் தலைவருக்கு கருணை மனு அனுப்ப முடிவு: தாயாா் பேட்டி

கோவையில் சிறுமி, சிறுவன் கொலை வழக்கில் மனோகரனுக்கு விதிக்கப்பட்ட தூக்கு தண்டனையை ரத்து செய்யக்கோரி குடியரசுத் தலைவருக்கு கருணை மனு அனுப்ப உள்ளதாக அவரது தாயாா் கூறினாா்.

கோவை: கோவையில் சிறுமி, சிறுவன் கொலை வழக்கில் மனோகரனுக்கு விதிக்கப்பட்ட தூக்கு தண்டனையை ரத்து செய்யக்கோரி குடியரசுத் தலைவருக்கு கருணை மனு அனுப்ப உள்ளதாக அவரது தாயாா் கூறினாா்.

கோவை, ரங்கேகவுடா் வீதியைச் சோ்ந்த தொழிலதிபா் ரஞ்சித்குமாா். இவரது மகள் முஸ்கான், மகன் ரித்திக். கடந்த 2010ஆம் ஆண்டு இவா்கள் பள்ளிக்குச் சென்றபோது கால்டாக்சி ஓட்டுநா் மோகன்ராஜ், அவரது கூட்டாளி மனோகரன் ஆகியோா் இருவரையும் கொலை செய்தனா். இச்சம்பவம் தொடா்பாக மோகன்ராஜ், மனோகரன் கைது செய்யப்பட்டனா். அப்போது போலீஸாரிடம் இருந்து தப்பியோட முயன்ற மோகன்ராஜ் சுட்டுக் கொல்லப்பட்டாா். இந்த வழக்கு கோவை மாவட்ட மகளிா் நீதிமன்றத்தில் விசாரிக்கப்பட்டு வந்தது. வழக்கை விசாரித்த நீதிமன்றம் மனோகரனுக்கு தூக்கு தண்டனை விதித்து தீா்ப்பளித்தது. இதை எதிா்த்து உச்சநீதிமன்றத்தில் மனோகரன் தாக்கல் செய்த மனுவைத் தள்ளுபடி செய்த நீதிமன்றம், அவரது தூக்கு தண்டனையை வியாழக்கிழமை உறுதி செய்தது.

இதுகுறித்து மனோகரனின் தாயாா் செல்வி கூறியதாவது:

எனது கணவா் உடல்நிலை சரியில்லாமல் உள்ளாா். மனோகரன் எங்களுக்கு ஒரே மகன். மனோகரன்தான் கூலி வேலைக்குச் சென்று எங்களைக் காப்பாற்றி வந்தாா். இந்நிலையில் விசாரணை முடிந்த பின்னா் விடுவிப்பதாகக் கூறி போலீஸாா் அவரை அழைத்துச் சென்றனா். என் மகன் மீது போலீஸாா் வீண் பழி சுமத்தியுள்ளனா். என் மகனுக்கு விதிக்கப்பட்ட தண்டனையை ரத்து செய்யக்கோரி, குடியரசுத் தலைவருக்கு கருணை மனு அனுப்ப உள்ளோம். கோவை மத்திய சிறையில் மனோகரன் அடைக்கப்பட்டிருந்தபோது அவரைச் சந்தித்தேன். கடலூா் சிறைக்கு அவா் மாற்றப்பட்ட பின்னா் சந்திக்கவில்லை. கடைசியாக ஒரு வாரத்துக்கு முன்னா் தொலைபேசியில் பேசினேன். அப்போது குடியரசுத் தலைவருக்கு கருணை மனு எழுதி அனுப்புமாறு கூறினாா் என்றாா்.

தினமணி'யை வாட்ஸ்ஆப் சேனலில் பின்தொடர... WhatsApp

தினமணியைத் தொடர: Facebook, Twitter, Instagram, Youtube, Telegram, Threads, Koo

உடனுக்குடன் செய்திகளை தெரிந்து கொள்ள தினமணி செயலியை பதிவிறக்கம் செய்யவும் 

Related Stories

No stories found.
Dinamani
www.dinamani.com