பிஏபி ஒப்பந்தம் விரைவில் புதுப்பிக்கப்படும் என்று சட்டப் பேரவை துணைத் தலைவா் பொள்ளாச்சி வி.ஜெயராமன் தெரிவித்தாா்.
பொள்ளாச்சியை அடுத்த ஆனைமலையில் தமிழக முதல்வரின் சிறப்பு குறைதீா் கூட்டம் மற்றும் நலத்திட்ட உதவிகள் வழங்கும் விழா புதன்கிழமை நடைபெற்றன. அமைச்சா் எஸ்.பி.வேலுமணி, சட்டப் பேரவை துணைத் தலைவா் பொள்ளாச்சி வி.ஜெயராமன் ஆகியோா் பயனாளிகளுக்கு நலத்திட்ட உதவிகளை வழங்கினா். மாவட்ட ஆட்சியா் கு.ராசாமணி, முன்னாள் அமைச்சா் செ.தாமோதரன், மக்களவை முன்னாள் உறுப்பினா் மகேந்திரன், மாவட்ட அதிமுக அவைத் தலைவா் வெங்கடாசலம், சட்டப் பேரவை உறுப்பினா்கள் கஸ்தூரி வாசு, கந்தசாமி, மாவட்ட வருவாய் அலுவலா் ராமதுரைமுருகன், மாவட்ட ஊரக வளா்ச்சி முகமை திட்ட இயக்குநா் ரமேஷ்குமாா் உள்ளிட்டோா் முன்னிலை வகித்தனா்.
முகாமில் 3110 பயனாளிகளுக்கு ரூ.5.5 கோடி மதிப்பிலான நலத்திட்ட உ தவிகள் வழங்கப்பட்டன. நிகழ்ச்சியில் அமைச்சா் எஸ்.பி.வேலுமணி பேசுகையில், ‘ முதல்வரால் தமிழக மக்களுக்காக பல்வேறு நலத் திட்டங்கள் செயல்படுத்தப்பட்டு வருகின்றன. மக்களின் குறைகளை நிவா்த்தி செய்ய அரசு முன்னுரிமை அளித்து வருகிறது என்றாா்.
பொள்ளாச்சி வி.ஜெயராமன் பேசுகையில், ‘முதல்வா் தலைமையில் நல்லாட்சி நடைபெற்று வருகிறது. ஆனைமலை வட்டம் தனியாக பிரிக்கப்பட்டதன் பயனாக 973 பயனாளிகளுக்கு முதியோா் உதவித் தொகை வழங்கப்படுகிறது. உழவா் பாதுகாப்புத் திட்டம் உள்ளிட்ட பல்வேறு நலத்திட்ட உதவிகள் வழங்கப்படுகின்றன. ஆனைமலையாறு மற்றும் நல்லாறு திட்டங்கள் விரைவில் துவங்கப்படும். பிஏபி ஒப்பந்தம் புதுப்பிக்கப்படும்’ என்றாா்.