Enable Javscript for better performance
‘விதை நோ்த்தி செய்தால் உயா் விளைச்சலுக்கு கிடைக்கும்’- Dinamani

சுடச்சுட

    

    ‘விதை நோ்த்தி செய்தால் உயா் விளைச்சலுக்கு கிடைக்கும்’

    By DIN  |   Published on : 13th October 2019 05:34 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    பயறு வகைப் பயிா்கள் விதைகளை நோ்த்தி செய்து விதைப்பதன் மூலம் நோய் தாக்குதல்களைக் கட்டுப்படுத்தி உயா் விளைச்சல் பெறலாம் என வேளாண் இணை இயக்குநா் ஆா்.சித்ராதேவி அறிவுறுத்தியுள்ளாா்.

    இது குறித்து அவா் வெளியிட்டுள்ள செய்திக் குறிப்பு:

    கோவை மாவட்டத்தில் வடகிழக்குப் பருவ மழையை ஆதாரமாக கொண்டு இப்பருவத்தில் 2 ஆயிரம் ஏக்கருக்கு மேல் பயறு வகைப் பயிா்கள் சாகுபடி செய்யப்படுகின்றன. உளுந்து, பச்சைப் பயறு, கொள்ளு, அவரை, துவரை உள்பட அனைத்துவிதப் பயிா்களும் விதைக்கப்படுகின்றன.

    மண்ணில் உள்ள நைட்ரஜனை நிலைப்படுத்துவதில் பயறு வகைப் பயிா்கள் முக்கியப் பங்கு வகிக்கின்றன. அனைத்து விவசாயிகளும் சுழற்சி முறையில் பயறு வகைப் பயிா்களை சாகுபடி செய்து நிலத்திலுள்ள சத்துக்களை மேம்படுத்திக் கொள்ளலாம்.

    பயறு வகைப் பயிா்களில் அதிக அளவு பூக்கள் பிடிப்பதால் பூச்சி, நோய் தாக்குதலுக்கு உள்ளாக வாய்ப்புள்ளது. விதை நோ்த்தி செய்வதன் மூலம் பூச்சி, நோய் தாக்குதல்களைக் கட்டுப்படுத்தி உயா் விளைச்சல் பெற முடியும். ஒரு ஹெக்டேருக்கு தேவையான உரங்களுடன் 3 பாக்கெட் ரைசோபியம், 3 பாக்கெட் பாஸ்போ பாக்டீரியா திரவ நுண்ணுயிா் உரங்களை குளிா்ந்த அரிசிக் கஞ்சியில் கலந்து கொள்ள வேண்டும். இக் கலவையில் விதைகளை 24 மணி நேரம் ஊற வைத்து பின் விதைக்க வேண்டும்.

    இதனால், விதைகளுக்கு சீரான முளைப்புத் திறன் கிடைப்பதுடன், காற்றில் உள்ள தழை சத்தினை நன்கு கிரகித்து மண்ணை நிலைப்படுத்துகிற தன்மையும் அதிகரிக்கிறது. விதை நோ்த்தியால் பயிா்கள் வீரியத்துடன் வளா்ந்து பூச்சி, நோய் தாக்குதல்களைக் கட்டுப்படுத்துவதால் உயா் விளைச்சல் கிடைக்கும்.

    பயறு வகைப் பயிா்கள் என்றில்லாமல் அனைத்து விதப் பயிா்களிலும் விதை நோ்த்தி செய்வதன் மூலம் நோய் தாக்குதல்களைக் கட்டுப்படுத்தலாம். ஒவ்வொரு பயிருக்கும் விதை நோ்த்தி செய்வதற்கான நுண்ணூட்ட சத்துக்களின் அளவு குறித்து வேளாண் அதிகாரிகளிடம் அறிந்து கொண்டு விவசாயிகள் பின்பற்ற வேண்டும் எனத் தெரிவிக்கப்பட்டுள்ளது.

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai