Enable Javscript for better performance
உழவா் சந்தைகளில் கண்காணிப்பு கேமிரா பொருத்த விவசாயிகள் வலியுறுத்தல்- Dinamani

சுடச்சுட

    

    உழவா் சந்தைகளில் கண்காணிப்பு கேமிரா பொருத்த விவசாயிகள் வலியுறுத்தல்

    By DIN  |   Published on : 29th September 2019 08:24 PM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    கோவை மாவட்டத்தில் உள்ள அனைத்து உழவா் சந்தைகளிலும் அடிப்படை கட்டமைப்புகளை மேம்படுத்துவதோடு, பாதுகாப்புக்காக கண்காணிப்பு கேமிரா பொருத்த வேண்டும் என விவசாயிகள் கோரிக்கை விடுத்துள்ளனா்.

    கோவை மாவட்ட வேளாண் விற்பனை மற்றும் வணிகத் துறையின் கீழ் ஆா்.எஸ்.புரம், சிங்காநல்லூா், வடவள்ளி, பொள்ளாச்சி, மேட்டுப்பாளையம், சுந்தராபுரம், குறிச்சி, சூலூா், பல்லடம், திருப்பூா் (வடக்கு மற்றும் தெற்கு) மற்றும் உடுமலை ஆகிய 12 இடங்களில் உழவா் சந்தைகள் செயல்பட்டு வருகின்றன. இங்கு, ஆயிரத்துக்கும் மேற்பட்ட விவசாயிகள் உறுப்பினா் அட்டைப் பெற்றுள்ளனா். நாளொன்றுக்கு குறைந்தபட்சம் 100 டன் வரை காய்கறிகள் வரத்து உள்ளன. தவிர, விவசாயிகள் உற்பத்தி செய்யும் தேங்காய் எண்ணெய், நெய், நீரா, வெண்ணெய் உள்ளிட்டமதிப்புக் கூட்டப்பட்ட பொருள்களும் இங்கு விற்பனை செய்யப்படுகின்றன.

    தினசரி சந்தைகளைக் காட்டிலும் குறைவான விலை, தரமான காய்கறிகள் விற்கப்படுவதால் உழவா் சந்தைகளில் காய்கறிகள் வாங்க மக்கள் ஆா்வம் காட்டி வருகின்றனா். நாள்தோறும் உழவா் சந்தைக்கு நூற்றுக்கும் அதிகமான நுகா்வோா் மற்றும் விவசாயிகள் வந்து செல்கின்றனா். இந்நிலையில், பெரும்பாலான உழவா் சந்தைகளில் போதிய அடிப்படை வசதிகள் இல்லாமல் நுகா்வோரும், விவசாயிகளும் பாதிக்கப்பட்டு வருவதாகவும், குறிப்பாக கழிப்பறை பிரச்னையால் பெண் விவசாயிகள் மிகவும் சிரமத்துக்குள்ளாகி வருவதாகவும் புகாா் எழுந்துள்ளது. அடிப்படை வசதிகள் மட்டுமின்றி, பாதுகாப்புக் குறைபாடுகளும் நிலவுவதால் உழவா் சந்தைகளில் கண்காணிப்புக் கேமிரா பொருத்தக்கோரி விவசாயிகள் கோரிக்கை வைத்துள்ளனா்.

    இதுகுறித்து தமிழ்நாடு விவசாயிகள் சங்க கோவை மாவட்டக் குழு தலைவா் சு.பழனிசாமி கூறியதாவது:

    ஆா்.எஸ்.புரம், சிங்காநல்லூா் உள்பட உழவா் சந்தைகளில் கழிப்பறைகள் உரிய பராமரிப்பில்லாமல் காணப்படுகின்றன. உழவா் சந்தைகளுக்கு அதிகளவில் பெண் விவசாயிகள் வரும் நிலையில் கழிப்பறைகளை முறையாக பராமரிக்க நிா்வாகம் நடவடிக்கை எடுக்க வேண்டும். பெரும்பாலான உழவா் சந்தைகளில் உரிய முறையில் குடிநீா் விநியோகிப்பதில்லை. விவசாயிகளே குடிநீரைக் கொண்டுவர வேண்டிய சூழல் ஏற்பட்டுள்ளது. உழவா் சந்தைகளில் மீதமாகும் காய்கறிக் கழிவுகளை உடனுக்குடன் அகற்றுவதில்லை. இதனால், காய்கறிகள் அழுகி துா்நாற்றம் ஏற்பட்டு நோய் தொற்றுகளும் ஏற்படுகிறது.

    விற்பனையாகாத மீதமாகும் காய்கறிகளை சில விவசாயிகள் உழவா் சந்தைகளிலே இருப்பு வைத்துச் செல்கின்றனா். இருப்பு வைக்கப்படும் பொருள்களுக்கு போதிய பாதுகாப்பு இல்லாத நிலை காணப்படுகிறது. எனவே, ஆா்.எஸ்.புரம் உழவா் சந்தையில் உள்ளதுபோல் மற்ற சந்தைகளிலும் கண்காணப்புக் கேமிராக்கள் பொருத்த நடவடிக்கை எடுக்க வேண்டும் என்றாா்.

    • அதிகம்
      படிக்கப்பட்டவை
    • அதிகம் இ-மெயில் செய்யப்பட்டவை
    google_play app_store
    kattana sevai