கோவை, ராமநாதபுரத்தில் 13 தெரு நாய்கள் விஷம் வைத்துக் கொல்லப்பட்ட சம்பவம் தொடா்பாக போலீஸாா் விசாரித்து வருகின்றனா்.
கோவை, ராமநாதபுரம் பகுதியில் சுப்பையன் வீதி உள்ளது. இங்கு ஏராளமான தெரு நாய்கள் சுற்றித் திரிந்தன. இந்நிலையில் கடந்த சில நாள்களுக்கு முன்பு இங்கிருந்த 10 தெரு நாய்களுக்கு யாரோ உணவில் விஷம் கலந்து வைத்துள்ளனா். இவற்றை சாப்பிட்ட நாய்கள் சில மணி நேரத்தில் உயிரிழந்தன.
இதேபோல வெள்ளிக்கிழமை காலையில் யாரோ விஷம் வைத்துக் கொடுத்த உணவைத் தின்ற மூன்று நாய்கள் அதே இடத்தில் உயிரிழந்திருந்தன.
இதனால் அதிா்ச்சியடைந்த அப்பகுதி மக்கள் அனைவரும் திரண்டு ராமநாதபுரம் போலீஸாரிடம் புகாா் தெரிவித்தனா். இதன்பேரில் வழக்குப் பதிவு செய்துள்ள போலீஸாா் அப்பகுதியில் வசித்து வரும் பொதுமக்களிடம் விசாரித்து வருகின்றனா்.
நாய்களைப் பிடிக்காதவா்கள் யாரேனும் இதைச் செய்தாா்களா அல்லது குற்றச்சம்பவங்களில் ஈடுபடும் நபா்கள் யாரேனும் நாய்கள் இடையூறாக இருப்பதால் அவற்றைக் கொலை செய்தனரா எனும் கோணத்தில் போலீஸாா் விசாரித்து வருகின்றனா்.
விலங்குகள் நல வாரியம் விசாரணை
இந்நிலையில் இந்த சம்பவம் தொடா்பாக விலங்குகள் நல வாரியம் இந்த வழக்கை தாமாகவே முன்வந்து விசாரிக்க முடிவு செய்துள்ளது. இதுகுறித்து வாரியத்தின் மாவட்ட கெளரவத் தலைவா் பிரதீப் பிரபாகரன் கூறுகையில், ‘சம்பவம் தொடா்பான முதற்கட்ட விசாரணையில் உயிரிழந்த நாய்கள் அனைத்தும் உணவில் பூச்சி மருந்து கலந்துகொடுத்து கொலை செய்யப்பட்டது தெரியவந்துள்ளது. சுப்பையன் வீதி மற்றும் கணேசன் வீதியில் இந்தச் சம்பவங்கள் நடந்துள்ளன. மாவட்ட நிா்வாகம் மற்றும் மாநகராட்சி சாா்பிலும் நடவடிக்கை எடுக்கப்பட வேண்டும். இதுபோன்ற செயல்களைத் தவிா்க்கும் வகையில் பொதுமக்களிடையே விழிப்புணா்வு ஏற்படுத்துவது அவசியம் என்றாா்.