கோயில்களைத் திறக்க வலியுறுத்தி இந்து முன்னணியினா் ஆா்ப்பாட்டம்

கோயில்களைத் திறக்க வலியுறுத்தி இந்து முன்னணியினா் ஒற்றைக் காலில் நின்று ஆா்ப்பாட்டத்தில் புதன்கிழமை ஈடுபட்டனா்.

தமிழகத்தில் கோயில்களைத் திறக்க வலியுறுத்தி இந்து முன்னணி சாா்பில் கடந்த சில நாள்களுக்கு முன்பு கோயில்களுக்கு முன்பு தோப்புக்கரணம் போடும் போராட்டம் நடத்தப்பட்டது. இந்நிலையில் அதே கோரிக்கையை வலியுறுத்தி கோயில்களுக்கு முன்பு ஒற்றைக் காலில் நின்று ஆா்ப்பாட்டத்தில் ஈடுபடப்போவதாக இந்து முன்னணியின் மாநிலத் தலைவா் காடேஸ்வரா சி.சுப்பிரமணியம் அறிவித்திருந்தாா்.

இதன்படி கோவை, காந்திபுரம் பகுதியில் உள்ள சித்தி விநாயகா் கோயிலின் முன்பு அந்த அமைப்பினா் ஒற்றைக் காலில் நின்று நூதன ஆா்ப்பாட்டத்தில் புதன்கிழமை ஈடுபட்டனா். போராட்டத்துக்கு மாவட்டத் தலைவா் கே.தசரதன் தலைமை வகித்தாா். மாநில நிா்வாகக் குழு உறுப்பினா் குணா, கோவை கோட்டச் செயலா் எஸ்.சதிஷ், மாவட்ட செய்தி தொடா்பாளா் சி.தனபால், கோட்ட பேச்சாளா் ஆ.கிருஷ்ணன் உள்ளிட்டோா் பங்கேற்றனா்.