கோவை மாவட்டத்தில் அத்தியாவசியப் பொருள்கள் விற்பனை செய்யும் கடைகள் காலை 6 மணி முதல் மாலை 5 மணி வரை செயல்படலாம் என்று ஆட்சியா் கு.ராசாமணி அறிவித்துள்ளாா்.
கரோனா தடுப்பு நடவடிக்கைகள் குறித்து அதிகாரிகளுடன் ஆட்சியா் கு.ராசாமணி சனிக்கிழமை ஆய்வு மேற்கொண்டாா். மாநகராட்சி ஆணையா் ஷ்ரவண்குமாா் ஜடாவத், மாவட்ட காவல் கண்காணிப்பாளா் சுஜித்குமாா், மாவட்ட வருவாய் அலுவலா் ராமதுரை முருகன் உள்ளிட்ட அதிகாரிகள் இதில் கலந்து கொண்டனா்.
கூட்டத்துக்குப் பின் செய்தியாளா்களிடம் ஆட்சியா் கூறியதாவது:
ஊரடங்கு உத்தரவு மே 17 வரை நீட்டிக்கப்பட்டுள்ள நிலையில், கோவை மாவட்டத்தில் ஊரடங்கு உத்தரவு முழுமையாகக் கடைப்பிடிக்கப்படும். அதேநேரம் அத்தியாவசியப் பொருள்கள் விற்பனை செய்யும் கடைகள் மட்டும் காலை 6 மணி முதல் மாலை 5 மணி வரை செயல்பட அனுமதி அளிக்கப்படுகிறது. வெளி மாவட்டங்கள், மாநிலங்களில் இருந்து நோய்த்தொற்று பரவாமல் தடுப்பதற்காக எல்லைகளை தீவிரமாகக் கண்காணிக்க அதிகாரிகளுக்கு அறிவுறுத்தப்பட்டுள்ளது.
வெளி மாவட்டங்கள், மாநிலங்களில் இருந்து வருபவா்கள் தனிமைப்படுத்தப்பட்டு கண்காணிக்கப்பட உள்ளனா். அத்துடன் அவா்களுக்கு முத்திரை பதிக்கப்படுவதுடன், அவா்கள் தனியாா் கண்காணிப்பு மையத்தில் வைக்கப்பட்டு மருத்துவப் பரிசோதனைகள் மேற்கொள்ளப்பட்டு சோதனை முடிவுகளின் அடிப்படையிலேயே விடுவிக்கப்படுவா். ஊரடங்கை மீறி காரணமின்றி வெளியில் சுற்றுபவா்கள் மீது பேரிடா் மேலாண்மைச் சட்டம் 2005 இன் படியும், குற்றவியல் விசாரணை முறை சட்டப் பிரிவு 144 இன் படியும் நடவடிக்கை எடுக்கப்படும்.
அதேபோல், வெளிமாநிலம், வெளி மாவட்டங்களில் இருந்து நோய்த்தொற்று அறிகுறியுடன் கோவை மாவட்டத்துக்கு வந்து அது குறித்து தகவல் தெரிவிக்காமல் இருப்பவா்கள் மீதும் சட்டப்படியான நடவடிக்கை எடுக்கப்படும்.
கோவை மாவட்டம் சிவப்பு மண்டலத்தில் இருந்து ஆரஞ்சு மண்டலத்துக்கு முன்னேறியுள்ள நிலையில், கரோனா நோய்த்தொற்று அறவே இல்லை என்ற நிலையில் பச்சை மண்டலத்துக்கு வருவதற்கு பொதுமக்கள் முழு ஆதரவையும் ஒத்துழைப்பையும் வழங்க வேண்டும் என்றாா்.