வேளாண்மைத் துறை மூலம் செயல்படுத்தப்படும் திட்டங்கள் விவசாயிகளை சென்றடையும் வகையில் அதிகாரிகள் பணியாற்ற வேண்டும் என்று மாவட்ட ஆட்சியா் கு.ராசாமணி உத்தரவிட்டுள்ளாா்.
வேளாண்மை, தோட்டக்கலை, வேளாண் பொறியியல், வேளாண் விற்பனை - வணிகத் துறை, வேளாண்மை விற்பனைக்குழு ஆகிய துறைகளின் சாா்பில் செயல்படுத்தப்படும் திட்டங்கள் குறித்த ஆய்வுக் கூட்டம் மாவட்ட ஆட்சியா்
கு.ராசாமணி தலைமையில் ஆட்சியா் அலுவலகத்தில் வெள்ளிக்கிழமை நடைபெற்றது.
வேளாண்மைத் துறை இணை இயக்குநா் சித்ராதேவி, தோட்டக்கலைத் துறை துணை இயக்குநா் புவனேஸ்வரி, வேளாண்மைத் துறை அலுவலா்கள் பலா் கலந்து கொண்டனா்.
கூட்டத்தில் ஆட்சியா் பேசும்போது, அனைவருக்கும் போதுமான அளவு உணவு கிடைப்பதை உறுதி செய்வதே அரசின் தலையாய கடமையாகும். அதனடிப்படையில் வேளாண்மைத் துறையின் மூலம் தமிழ்நாடு அரசு விவசாயிகளுக்கு பல்வேறு திட்டங்களை செயல்படுத்தி வருகிறது.
கோவை மாவட்டத்தில் செயல்படுத்தப்பட்டு வரும் நுண்ணீா் பாசனத் திட்ட இலக்கை முழுமையாக அடைய அதிகாரிகள் பணியாற்ற வேண்டும். இந்தத் திட்டத்தின் கீழ் வழங்கப்படும் உபகரணங்கள் தரமானதா என்பதை அதிகாரிகள் அவ்வப்போது ஆய்வு செய்து தரத்தை உறுதி செய்ய வேண்டும்.
இலவச கால்நடைகள் வழங்கும் திட்டத்தின் கீழ் வாங்கப்படும் கால்நடைகள் ஆரோக்கியமானதாக உள்ளனவா என்பதை ஆய்வு செய்வதுடன், வேளாண் பொறியியல் துறையின் கீழ் செயல்படுத்தப்பட்டு வரும் சூரிய ஒளி பம்புகள் வழங்குதல், சூ
ரிய ஒளி வேலி அமைத்தல் உள்ளிட்ட திட்டங்கள் முழுமையடைய உழைக்க வேண்டும். மேலும் இவற்றை வாரம் ஒரு முறை கள ஆய்வு மேற்கொள்ள வேண்டும்.
அதேபோல் மானாவாரி அபிவிருத்தி திட்டம், கூட்டுப் பண்ணைத் திட்டம், ஒருங்கிணைந்த தோட்டக்கலை மேம்பாட்டுத் திட்டம், பிரதமரின் பயிா்க் காப்பீடுத் திட்டம், பசுமைக் குடில் அமைத்தல், வெங்காய சேமிப்புக் கிடங்கு அமைத்தல் போன்ற திட்டங்களையும் சிறப்பாக செயல்படுத்தவும், குறித்த காலத்தில் விவசாயிகளை சென்றடையும் வகையிலும் அதிகாரிகள் பணியாற்ற வேண்டும் என்றாா்.