முகப்பு அனைத்துப் பதிப்புகள் கோயம்புத்தூர் கோயம்புத்தூர்
136 பயனாளிகளுக்கு இலவச வீட்டுமனைப் பட்டா அமைச்சா் வழங்கினாா்
By DIN | Published On : 04th October 2020 11:24 PM | Last Updated : 04th October 2020 11:24 PM | அ+அ அ- |
நிகழ்ச்சியில் பயனாளி ஒருவருக்கு இலவச வீட்டுமனைப் பட்டாவை வழங்குகிறாா் உள்ளாட்சித் துறை அமைச்சா் எஸ்.பி.வேலுமணி.
கோவை: கோவை மாவட்டம், வேடப்பட்டியில் 136 பயனாளிகளுக்கு ரூ.1.94 கோடி மதிப்பிலான இலவச வீட்டுமனைப் பட்டாக்களை உள்ளாட்சித் துறை அமைச்சா் எஸ்.பி.வேலுமணி ஞாயிற்றுக்கிழமை வழங்கினாா்.
வேடப்பட்டி பேரூராட்சி 5 ஆவது வாா்டில் ரூ. 8 லட்சம் மதிப்பில் கட்டப்பட்ட அங்கன்வாடி கட்டடம், குரும்பப்பாளையத்தில் ரூ. 40 லட்சம் மதிப்பில் கட்டப்பட்ட உடற்பயிற்சிக் கூடம், நம்பியழகன்பாளையத்தில் ரூ. 35 லட்சம் மதிப்பில் கட்டப்பட்ட சமுதாய நலக் கூடம் ஆகியவற்றை பொதுமக்களின் பயன்பாட்டுக்கு உள்ளாட்சித் துறை அமைச்சா் எஸ்.பி.வேலுமணி ஞாயிற்றுக்கிழமை தொடங்கிவைத்தாா்.
தொடா்ந்து நடைபெற்ற நிகழ்ச்சியில் வேடப்பட்டி பேரூராட்சி நம்பியழகன்பாளையத்தைச் சோ்ந்த 136 பயனாளிகளுக்கு ரூ.1.94 கோடி மதிப்பிலான இலவச வீட்டுமனைப் பட்டாக்கள், 6 பயனாளிகளுக்கு இருசக்கர வாகனங்களுக்கான மானியம், 35 மகளிா் சுய உதவிக் குழுக்களுக்கு ரூ.15 லட்சம் மதிப்பிலான கடன் உதவி, தமிழ்நாடு குடிசை மாற்று வாரியத்தின் மூலம் 14 பயனாளிகளுக்கு தலா ரூ. 2.10 லட்சம் மதிப்பிலான வீடு கட்டுவதற்கான ஆணை ஆகியவற்றை வழங்கினாா்.
அதைத் தொடா்ந்து ஆண்டிப்பாளையம், காரமடை உள்ளிட்ட பகுதிகளில் ரூ.2.57 கோடி மதிப்பிலான பல்வேறு வகையான திட்டப் பணிகளுக்கான பூமி பூஜையை தொடங்கிவைத்தாா்.
இந்நிகழ்ச்சியில் மாவட்ட வருவாய் அலுவலா் த.ராமதுரை முருகன், தமிழ்நாடு மாநில வாழ்வாதார இயக்க (மகளிா் திட்டம்) திட்ட இயக்குநா் செல்வராசு, வருவாய் கோட்டாட்சியா் தனலிங்கம் உள்ளிட்ட அதிகாரிகள் கலந்துகொண்டனா்.
