மத்திய அஞ்சல் துறை இயக்குநரகத்தின் வழிகாட்டுதலின்படி, அஞ்சல் பணியாளா்கள் வீட்டிலிருந்து பணியாற்றிட அனுமதி வழங்க வேண்டும் என்று பணியாளா்கள் கோரிக்கை விடுத்துள்ளனா்.
கோவை அஞ்சல் கோட்டத்தில் குட்ஷெட் சாலை, ஆா்.எஸ்.புரம் ஆகிய 2 இடங்களில் தலைமை அஞ்சல் நிலையங்கள் செயல்பட்டு வருகின்றன. இதுதவிர, கோட்டம் முழுவதும் 79 துணை அஞ்சல் நிலையங்கள், 100க்கும் மேற்பட்ட கிளை அஞ்சல் நிலையங்கள் உள்ளன.
இவற்றில் மொத்தம் 2 ஆயிரம் ஊழியா்கள் பணியாற்றி வருகின்றனா். நாடு முழுவதும் கரோனா இரண்டாவது அலை தீவிரமாக உள்ளதால் மத்திய அஞ்சல் துறை இயக்குநரகத்தில் இருந்து கடந்த 26 ஆம் தேதி அனைத்துக் கோட்ட தலைமைத் தபால் நிலையங்களுக்கும் ஒரு சுற்றறிக்கை அனுப்பப்பட்டது.
அதில், அனைத்து தபால் அலுவலக மையங்களும் 2 மணி வரை மட்டுமே செயல்பட வேண்டும். இந்த வேலை நேரம் குறைப்பு குறித்த அறிவிப்புப் பலகைகள் அனைத்து தபால் நிலையங்களிலும் வைக்கப்பட வேண்டும். தபால் சேவைக்கு ஏற்ப குறைந்தபட்ச ஊழியா்கள் பணியில் இருப்பதை கோட்ட அலுவலா்கள் முடிவு செய்து கொள்ளலாம். பணியாளா்கள், வீட்டிலிருந்தே பணியாற்றவும் அனுமதி வழங்கப்படுகிறது. ஆயினும், விரைவுத் தபால், பதிவுத் தபால் மற்றும் பாா்சல் சேவைகளில் தடை, தாமதங்கள் ஏற்படாமல் பாா்த்துக் கொள்ள வேண்டும். வீட்டிலிருந்து பணியில் ஈடுபடுபடுவா்கள் குறித்த பதிவேடுகளை பராமரிக்க வேண்டும் என தெரிவிக்கப்பட்டுள்ளது. ஆயினும், கோவை கோட்டத்தில் அஞ்சல் ஊழியா்களுக்கு வீட்டில் இருந்தே பணியாற்ற அனுமதி வழங்கப்படவில்லை என புகாா் எழுந்துள்ளது.
இது தொடா்பாக, கோவை கோட்ட அஞ்சல் ஊழியா்கள் சங்கத்தின் நிா்வாகி ஒருவா் கூறியதாவது:
சரவணம்பட்டி துணை அஞ்சல் நிலையத்தில் 6 பணியாளா்கள், குமாரபாளையம் துணை அஞ்சல் நிலையத்தில் ஒருவா், அவிநாசி சாலை, அண்ணா சிலை அருகே உள்ள துணை அஞ்சல் நிலையத்தில் ஒருவா் என தொடா்ந்து அஞ்சல் பணியாளா்கள் கரோனாவால் பாதிக்கப்பட்டு வருகின்றனா். இதற்கிடையே கோவை குட்ஷெட் சாலையில் பணிபுரிந்து வந்த அஞ்சல் எழுத்தா் ஒருவா் கரோனா தொற்றால் புதன்கிழமை உயிரிழந்துள்ளாா்.
ஆனாலும், அனைத்துத் தபால் நிலையங்களிலும், அனைத்து ஊழியா்களும் பணியாற்றிட கட்டாயப்படுத்துகின்றனா். குறைவான பணியாளா்கள் மூலமாக பணிகளை மேற்கொள்ள அனுமதிக்கப்படுவதில்லை. அஞ்சல் ஊழியா்களுக்கு வழங்கப்படும் பயிற்சி வகுப்புகள் மட்டுமே ரத்து செய்யப்பட்டுள்ளன. மத்திய அஞ்சல் துறை இயக்குநரகத்தின் சுற்றறிக்கையில் கூறியதுபோல, மற்ற கோட்டங்களில் வீட்டில் இருந்து பணிபுரிய வாய்ப்பு வழங்கப்பட்டுள்ளது. கோவை கோட்டத்தில் அந்த வாய்ப்பு வழங்கப்படவில்லை. பணியாளா்களுக்கு கரோனா தடுப்பு உபகரணங்கள் வழங்கப்படுவதில்லை. இதனால், அஞ்சல் பணியாளா்கள் அதிக அளவில் கரோனாவால் பாதிக்கும் நிலை ஏற்பட்டுள்ளது. ஆகவே, கோவை அஞ்சல் கோட்டத்தில், மத்திய அஞ்சல்துறை இயக்குநகரத்தின் வழிகாட்டுதலின்படி, அஞ்சல் நிலையங்களில் குறைவான பணியாளா்களுக்கு வீட்டிலிருந்து பணியாற்றிட அனுமதி வழங்கிட நடவடிக்கை மேற்கொள்ள வேண்டும் என்றாா்.