கோவை வழித்தடத்தில் இயக்கப்படும் ரயில்கள் மாற்றுப்பாதையில் இயக்கம்

ஓமலூா் - மேட்டூா் இடையே ரயில் பாதையில் பராமரிப்புப் பணிகள் மேற்கொள்ளப்படுவதால் கோவை வழித்தடத்தில் இயக்கப்படும் ரயில்கள் மாற்றுப்பாதையில் இயக்கப்படுவதாக ரயில்வே நிா்வாகம் சாா்பில் தெரிவிக்கப்பட்டுள்ளது.

இது குறித்து, சேலம் கோட்ட ரயில்வே நிா்வாகம் வெளியிட்டுள்ள செய்திக்குறிப்பு:

ஓமலூா் - மேட்டூா் அணை இடையே ரயில் பாதையில் பொறியியல் பணிகள் மற்றும் சிக்னல் பராமரிப்புப் பணிகள் நடைபெறுவதால் கோவை வழித்தடத்தில் இயங்கும் ரயில்கள், மாற்று வழியில் இயக்கப்பட உள்ளன. அதன்படி, ஜனவரி 2 ஆம் தேதி மற்றும் மாா்ச் 2 ஆம் தேதி காலை 8.50 மணிக்கு, கோவையில் இருந்து லோக்மானியா திலக் நிலையத்துக்குப் புறப்படும் ரயில்(எண்: 11014) வழக்கமாக இயக்கப்படும் சேலம், தருமபுரி, ஹூசூரு வழித்தடத்துக்கு பதிலாக சேலம், குப்பம், பங்காரப்பேட்டை, கிருஷ்ணராஜபுரம் உள்ளிட்ட நிலையங்கள் வழியாக இயக்கப்படும். இதன் மூலம் தருமபுரி, ஹூசூரு நிலையங்கள் விடுபடும். மாா்ச் 2 ஆம் தேதி காலை 9.10 மணிக்கு, கேரள மாநிலம், எா்ணாகுளத்தில் இருந்து பெங்களூருவுக்கு புறப்படும் ரயில்(எண்: 12678) வழக்கமாக இயக்கப்படும் சேலம், தருமபுரி, ஹூசூரு வழித்தடத்துக்கு பதிலாக சேலம், குப்பம், பங்காரப்பேட்டை, கிருஷ்ணராஜபுரம் உள்ளிட்ட நிலையங்கள் வழியாக இயக்கப்படும். இதன் மூலம் தருமபுரி, ஹூசூரு, காா்மெலாரம் ஆகிய ரயில் நிலையங்கள் விடுபடும். மாா்ச் 2 ஆம் தேதி காலை 6.10 மணிக்கு பெங்களூருவில் இருந்து புறப்படும் ரயில் (எண்:12677) வழக்கமாக இயக்கப்படும் ஹூசூரு, தருமபுரி, சேலம் வழித்தடத்துக்கு பதிலாக கிருஷ்ணராஜபுரம், பங்காரபேட்டை, குப்பம், சேலம் உள்ளிட்ட நிலையங்கள் வழியாக இயக்கப்படும். இதன் மூலம் காா்மெலாரம், ஹீசூரு, தருமபுரி ஆகிய ரயில் நிலையங்கள் விடுபடும் எனத் தெரிவிக்கப்பட்டுள்ளது.