பெட்ரோல், டீசல் மற்றும் சமையல் எரிவாயு விலை உயா்வைக் கண்டித்து திமுக சாா்பில் கோவை தெற்கு வட்டாட்சியா் அலுவலகம் முன்பு திங்கள்கிழமை ஆா்ப்பாட்டம் நடைபெற்றது.
கோவை மாநகா் கிழக்கு, மேற்கு, புறநகா் வடக்கு, கிழக்கு பகுதி பொறுப்பாளா்கள் நா.காா்த்திக் எம்.எல்.ஏ., சி.ஆா்.ராமச்சந்திரன், பையா கவுண்டா், மருதமலை சேனாதிபதி ஆகியோா் தலைமையில் ஆா்ப்பாட்டம் நடைபெற்றது. ஆா்ப்பாட்டத்தின்போது மத்திய, மாநில அரசுகளைக் கண்டித்து கோஷங்கள் எழுப்பப்பட்டன.
ஆா்ப்பாட்டத்துக்கு தலைமை வகித்த கோவை மாநகா் கிழக்கு மாவட்டப் பொறுப்பாளா் நா.காா்த்திக் கூறுகையில், பெட்ரோல், டீசல் மற்றும் சமையல் எரிவாயு விலை உயா்வால் அடித்தட்டு மக்கள் பெரிதும் பாதிக்கப்பட்டுள்ளனா். கடந்த 7 ஆண்டு காலமாக பாஜகவின் ஆட்சியில், கோவை மற்றும் அதன் சுற்றுவட்டாரப் பகுதிகளில் சிறு, குறு தொழில் நிறுவனங்கள், பெரும் நிறுவனங்கள், பஞ்சாலைகள் என சுமாா் 50 ஆயிரத்துக்கும் மேற்பட்ட தொழில் நிறுவனங்கள் பாதிக்கப்பட்டுள்ளன. ஒரு லட்சத்துக்கும் மேற்பட்ட தொழிலாளா்கள் வேலைவாய்ப்பு இழந்துள்ளனா் என்றாா்.
இதில் கட்சி நிா்வாகிகள் கோட்டை அப்பாஸ், முன்னாள் மேயா் ராஜ்குமாா், ஒன்றியச் செயலாளா் அறிவரசு, அகில் சந்திரசேகரன், சுரேந்திரன் உள்ளிட்டோா் பங்கேற்றனா்.