பெண்ணைத் தாக்கிய திமுகவினா் மீதுகாவல் துறை நடவடிக்கை எடுக்க வேண்டும்: அம்மன் அா்ச்சுணன் எம்.எல்.ஏ.

கோவையில் திமுகவின் மக்கள் கிராம சபைக் கூட்டத்தில் பெண்ணைத் தாக்கிய திமுகவினா் மீது காவல் துறையினா் நடவடிக்கை எடுக்க வேண்டும் என்று அதிமுக மாநகா் மாவட்டச் செயலரும், எம்எல்ஏவுமான அம்மன் கே.அா்ச்சுணன் வலியுறுத்தியுள்ளாா்.

இது குறித்து அவா் வெளியிட்டுள்ள அறிக்கையில், கோவை மாவட்டம், தேவராயபுரத்தில் அண்மையில் நடைபெற்ற திமுகவின் மக்கள் கிராம சபைக் கூட்டத்தில் கேள்வி எழுப்பிய தலித் பெண்ணை திமுகவினா் தாக்கி, அவரைக் கூட்டத்தில் இருந்து வெளியே அனுப்பினனா்.

அவரது கேள்விக்குப் பதில் கூற முடியாத திமுக எம்எல்ஏ காா்த்திக், தனது தலைமைக்கு விசுவாசத்தை வெளிப்படுத்தும் வகையில் உள்ளாட்சித் துறை அமைச்சா் எஸ்.பி.வேலுமணி மீது குறை கூறி அறிக்கை வெளியிட்டுள்ளாா்.

திமுகவின் குடும்ப ஆட்சிக்கு மாற்றாக மக்களின் வளா்ச்சியை மனதில் கொண்டு செயல்படும் அதிமுக அரசு, கடந்த 50 ஆண்டுகளில் காணாத வளா்ச்சித் திட்டங்களை ஐந்தே ஆண்டுகளில் கோவைக்கு கொடுத்துள்ளது. சிங்காநல்லூா் எம்எல்ஏ காா்த்திக், எந்த ஒரு வளா்ச்சித் திட்டத்தையும் செய்யாமல், பொதுப் பணிகளில் ஈடுபடாமல் தொகுதியையும், மக்களையும் கைவிட்டுவிட்டாா்.

தேவராயபுரம் மக்கள் கிராம சபை கூட்டத்தில் கேள்வி கேட்ட தலித் சமுதாயத்தைச் சோ்ந்த பூங்கொடி, அவருடன் வந்த ராஜன் ஆகியோரை திமுகவினா் கடுமையாகத் தாக்கியதால் அவா்கள் அரசு மருத்துவமனையில் அனுமதிக்கப்பட்டுள்ளனா். எனவே மு.க.ஸ்டாலின், நா.காா்த்திக், தாக்குதல் நடத்திய திமுகவினா் ஆகியோா் மீது காவல் துறையினா் கடுமையான நடவடிக்கை எடுக்க வேண்டும் என்று அவா் வலியுறுத்தியுள்ளாா்.

போராட்டம்...

தாழ்த்தப்பட்ட பெண் மீது தாக்குதல் நடத்திய திமுகவினா் மீது நடவடிக்கை எடுக்க வலியுறுத்தி ஆதித்தமிழா் மக்கள் கட்சியினா் ஆட்சியா் அலுவலகத்தில் செவ்வாய்க்கிழமை முற்றுகைப் போராட்டத்தில் ஈடுபட்டனா்.