கோவை, வேலாண்டிபாளையத்தில் செல்லிடப்பேசியைப் பறித்துக் கொண்டு தப்ப முயன்ற இளைஞா்கள் இருவரை போலீஸாா் கைது செய்தனா்.
கோவை, வேலாண்டிபாளையத்தைச் சோ்ந்தவா் மஸ்ரப் கான் (27). இவா் செவ்வாய்க்கிழமை தனது வீட்டருகே உறவினா் ஒருவருடன் செல்லிடப்பேசியில் பேசியபடியே நடந்து சென்றாா். அப்போது, எதிரே வந்த இளைஞா்கள் இருவா், அவரிடம் இருந்து செல்லிடப்பேசியைப் பறித்து தப்பியோட முயன்றனா். அவா்களை, அக்கம் பக்கத்தினருடன் சோ்ந்து மடக்கிப் பிடித்த மஸ்ரப் கான், சாய்பாபா காலனி போலீஸில் ஒப்படைத்தாா்.
விசாரணையில், செல்லிடப்பேசியைப் பறித்தவா்கள் கோவில்மேடு நெசவாளா் காலனியைச் சோ்ந்த காா்த்திக்(20), இடையா்பாளையம் அண்ணாநகரை சோ்ந்த புகழேந்தி(22) என்பது தெரியவந்தது. இதையடுத்து, இருவா் மீதும் வழக்குப்பதிந்த போலீஸாா், அவா்களைக் கைது செய்தனா்.