கோவையில் நகை பறிக்கும் கலாசாரம் அதிகரிப்பு: எஸ்.பி.வேலுமணி எம்எல்ஏ குற்றச்சாட்டு

கோவையில் நகைப்பட்டறைத் தொழிலாளா்களைத் தாக்கி நகைகளை பறித்துச் செல்லும் நிகழ்வுகள் தொடா்கதையாகி இருப்பதாகவும், தங்க நகைப் பட்டறைத் தொழிலில் ஈடுபடுட்டுள்ளவா்களுக்கு அரசு உரிய பாதுகாப்பு வழங்க வேண்டும் என்றும் எஸ்.பி.வேலுமணி எம்எல்ஏ வலியுறுத்தியுள்ளாா்.

கோவையில் கடந்த 22- ஆம் தேதி இருசக்கர வாகனத்தில் சென்ற செல்வபுரத்தைச் சோ்ந்த தங்க நகைப்பட்டறை உரிமையாளா் ராஜேந்திரன், ஊழியா் சாந்தகுமாா் ஆகிய இருவரையும் காரில் வந்த ஒரு கும்பல் தாக்கி நகைகளைக் கொள்ளையடித்துச் சென்றது. தாக்குதலில் காயமடைந்த இருவரையும் எஸ்.பி.வேலுமணி செவ்வாய்க்கிழமை நேரில் சந்தித்து ஆறுதல் கூறினாா்.

இதைத் தொடா்ந்து செய்தியாளா்களிடம் அவா் கூறியதாவது:

கோவையில் காந்திபாா்க், செல்வபுரம், உள்ளிட்ட சுற்றுவட்டாரப் பகுதிகளில் ஏராளமான தங்க நகைப்பட்டறைகள் செயல்பட்டு வருகின்றன. தற்போது, நகையை எடுத்துச் செல்லும் பட்டறை உரிமையாளா்கள், தொழிலாளா்களைத் தாக்கி அவற்றைப் பறித்துச் செல்லும் நிகழ்வுகள் தொடா்கதையாகியுள்ளன.

இதுபோன்ற சம்பவங்களால் நகைப்பட்டறை உரிமையாளா்கள், தொழிலாளா்கள் அச்சமடைந்துள்ளனா். இதுபோன்ற சம்பவங்கள் இனியும் நடைபெறாமல் இருக்க காவல் துறை உரிய நடவடிக்கை எடுக்க வேண்டும். அதேபோல் வயதானவா்களைத் தாக்கி நகை, பணத்தை பறிக்கும் சம்பவங்களும் அதிகரித்துள்ளன.

இவற்றைத் தடுத்து நிறுத்தி வியாபாரிகளுக்கும், பொதுமக்களுக்கும் உரிய பாதுகாப்பு கிடைக்க அரசு நடவடிக்கை எடுக்க வேண்டும். இல்லாவிட்டால் அரசைக் கண்டித்து அதிமுக சாா்பில் போராட்டம் நடத்தப்படும் என்றாா்.

X
Dinamani
www.dinamani.com