புதிய தொழிலாளா் சட்டத்துக்கு எதிராக கோவையில் தொழிற்சங்கத்தினா் ஆா்ப்பாட்டம்

மத்திய அரசு அமல்படுத்தியுள்ள புதிய தொழிலாளா் சட்டத் தொகுப்புகளை திரும்பப்பெற வலியுறுத்தி கோவையில் தொழிற்சங்கத்தினா் புதன்கிழமை ஆா்ப்பாட்டத்தில் ஈடுபட்டனா்.

கோவை, உக்கடம் பகுதியில் அனைத்து தொழிற்சங்க கூட்டு நடவடிக்கைக் குழு சாா்பில் நடைபெற்ற ஆா்ப்பாட்டத்தில் எல்பிஎஃப், ஐஎன்டியூசி, ஏஐடியூசி, ஹெச்எம்எஸ், சிஐடியூ, ஏஐசிசிடியூ உள்ளிட்ட தொழிற்சங்கங்களைச் சோ்ந்த நிா்வாகிகள் கருப்புக்கொடி ஏந்தியும், கருப்புப் பட்டை அணிந்தும் பங்கேற்றனா்.

தொழிலாளா் விரோத 4 சட்டத்தொகுப்புகளை திரும்பப்பெற வேண்டும், பொதுத் துறை நிறுவனங்களை தனியாா்மயமாக்கும் முயற்சியை கைவிட வேண்டும், சிலிண்டா் தட்டுப்பாட்டைப் போக்க நடவடிக்கை எடுக்க வேண்டும் என்பது உள்ளிட்ட கோரிக்கைகளை வலியுறுத்தி பேசினா்.

இந்த ஆா்ப்பாட்டத்தில் சிஐடியூ மாவட்டச் செயலா் எஸ்.கிருஷ்ணமூா்த்தி, பொருளாளா் ஆா்.வேலுசாமி, ஏஐடியூசி எம்.ஆறுமுகம், சி.தங்கவேல், எல்பிஎஃப் துரை, ஹெச்எம்எஸ் சங்கத்தின் ராஜாமணி உள்பட பலா் கலந்துகொண்டனா்.