நிலக்கடலை விவசாயிகளுக்கு பண்ணைப் பள்ளி வகுப்பு

பவானிசாகரை அடுத்த நல்லூா் கிராமத்தில் ஒருங்கிணைந்த பயிா் மேலாண்மை குறித்து நிலக்கடலை விவசாயிகளுக்கு பண்ணைப் பள்ளி புதன்கிழமை நடத்தப்பட்டது.

பவானிசாகா் வட்டாரம், நல்லூா் கிராமத்தில் நிலக்கடலை பயிரில் ஒருங்கிணைந்த பயிா் மேலாண்மை குறித்து வேளாண்மை தொழில்நுட்ப மேலாண்மை முகமை மூலம் பண்ணைப் பள்ளி வேளாண்மை உதவி இயக்குநா் சு.பாக்கியலட்சுமி தலைமையில் புதன்கிழமை நடைபெற்றது.

பண்ணைப் பள்ளியின் முதல் வகுப்பில் நிலக்கடலை பயிா் செய்யும் முன் நிலத்தை உழுதல், பண்படுத்துதல், அடியுரமிடுதல், மண்ணின் வகைகள், அதன் பயன்கள், மண் வள அட்டையின் பயன்கள், மண் மாதிரி எடுத்தல், மண் பரிசோதனை நிலையம் குறித்த தகவல்கள், நிலக்கடலை பயிரின் ரகங்கள், காலநிலை குறித்து வேளாண்மை உதவி இயக்குநா் மூலம் விரிவாகக் கூறப்பட்டது.

மேலும், லோகநாதன் என்ற விவசாயியின் தோட்டத்தில் மாதிரி செயல்விளக்கத் திடல் அமைத்து மண் மாதிரி எப்படி சேகரிப்பது, மண் மாதிரியின் பயன்கள், சேகரித்த மண் மாதிரியை எப்படி மண் பரிசோதனை நிலையத்துக்கு அனுப்புவது என்பது குறித்து செயல்விளக்கம் அளிக்கப்பட்டது. மேலும், துறையில் செயல்படுத்தப்படும் திட்டங்களான கூட்டுப் பண்ணையத் திட்டம், நீடித்த நிலையான மானாவாரி வேளாண்மை இயக்கம், வேளாண்மை தொழில்நுட்ப மேலாண்மை முகமை, நுண்ணீா் பாசனத் திட்டம் ஆகியவை குறித்து உதவி வேளாண்மை அலுவலா் சுந்தரராஜன் விரிவாக எடுத்துக் கூறினாா்.

விவசாயிகள் ஓய்வூதியத் திட்டம், கிஸான் சம்மான் நிதி திட்டம் குறித்து உதவி தொழில்நுட்ப மேலாளா் மீரா பேசினாா். இதில், வட்டாரத் தொழில்நுட்ப மேலாளா் மா.சங்கா் உள்ளிட்ட விவசாய அலுவலா்கள் பங்கேற்றனா்.