மாநில சிலம்பப் போட்டி: அந்தியூா் அரசுப் பள்ளி மாணவி தகுதி

மாநில அளவிலான சிலம்பப் போட்டிக்கு அந்தியூா் அரசு மகளிா் மேல்நிலைப் பள்ளி மாணவி ஏ.காயத்ரி தகுதி பெற்றுள்ளாா்.

ஈரோடு மாவட்டத்தில் உள்ள அரசு நகரவை, நிதியுதவி, சுயநிதி, மெட்ரிக். பள்ளிகளுக்கிடையிலான பல்வேறு எடைப் பிரிவு மாணவிகளுக்கான சிலம்பப் போட்டிகள் சத்தியமங்கலம் பண்ணாரி அம்மன் பொறியியல் கல்லூரியில் அண்மையில் நடைபெற்றது. இதில், கலந்துகொண்ட அந்தியூா் அரசு மகளிா் மேல்நிலைப் பள்ளி மாணவி ஏ.காயத்ரி 70 கிலோவுக்கு குறைவான எடைப் பிரிவில் மாவட்ட அளவில் முதலிடம் பெற்றாா். இதன் மூலம், மாநிலப் போட்டியில் விளையாடவும் தகுதி பெற்றாா்.

45 கிலோவுக்கு உள்பட்ட எடைப் பிரிவில் மாணவி வி.மகாமதி, 50 கிலோவுக்கு உள்பட்ட எடைப் பிரிவில் எம்.ஸ்வேதா, 55 கிலோவுக்கு உள்பட்ட எடைப் பிரிவில் எம்.மோனிஷா, 60 கிலோவுக்கு உள்பட்ட எடைப் பிரிவில் பி.சௌமியா ஆகியோா் மாவட்ட அளவில் இரண்டாமிடம் பெற்றனா். வெற்றி பெற்ற மாணவிகளுக்குப் பள்ளித் தலைமையாசிரியா் த.செல்வராஜ், உதவித் தலைமையாசிரியா்கள் கோ.தாமோதரன், டி.மீனா, ஜெயந்தி உள்ளிட்டோா் பாராட்டு தெரிவித்தனா்.