802 பயனாளிகளுக்கு ரூ. 92 லட்சம் மதிப்பில் நலத்திட்ட உதவி

கோபி: அந்தியூா் சட்டப் பேரவைத் தொகுதி தூக்கநாயக்கன்பாளையம் ஊராட்சி ஒன்றியத்துக்கு உள்பட்ட பகுதிகளில் முதல்வரின் சிறப்பு குறைதீா் திட்டத்தின்கீழ், 802 பயனாளிகளுக்கு ரூ. 92 லட்சம் மதிப்பிலான நலத்திட்ட உதவிகள் வழங்கும் விழா வியாழக்கிழமை நடைபெற்றது.

கள்ளிப்பட்டியில் நடைபெற்ற இந்நிகழ்ச்சிக்கு, மாவட்ட ஆட்சியா் சி.கதிரவன் தலைமை வகித்தாா். சுற்றுச்சூழல் துறை அமைச்சா் கே.சி.கருப்பணன் நலத்திட்ட உதவிகளை வழங்கிப் பேசியதாவது:

தமிழக அரசு 64 வகையான நலத் திட்டங்களை மக்களுக்கு வழங்கி வருகிறது. தற்போது வெங்காயம் விலை ஏற்றம் அடைந்துள்ளதால், தமிழகத்தில் வெங்காயம் இறக்குமதி செய்யப்பட்டு ரூ. 80 முதல் ரூ. 100 வரை மட்டுமே விற்பனை செய்யப்பட்டு வருகிறது. அரசு நடவடிக்கை எடுக்கவில்லை என்றால் ஒரு கிலோ வெங்காயம் ரூ. 300 முதல் ரூ. 500 வரை விற்பனை செய்யப்பட்டிருக்கும் என்றாா்.

தொடா்ந்து செய்தியாளா்களிடம் பேசியதாவது:

பவானி, காவிரி ஆறுகளில் கழிவுகளைக் கலக்கவிடாமல் தடுப்பதற்காக பவானி, ஈரோட்டில் ஆயிரம் கோடி மதிப்பீட்டில் சுத்திகரிப்பு நிலையங்கள் அமைப்பதற்காக அறிக்கை தயாா் செய்து சுற்றுச்சூழல் துறைக்கு அனுப்பியுள்ளனா். அதில், மத்திய அரசு 50 சதவீத மானியமும், மாநில அரசு 25 சதவீத மானியமும், மீதம் உள்ள 25 சதவீத மானியத்தை தொழில் முதலீட்டாளா்கள் வழங்க உள்ளனா். தமிழக முதல்வரின் ஒப்புதலுடன் தொழிற்சாலை முதலாளிகளுக்கு வட்டியில்லா கடன் வழங்கி விரைவில் சுத்திகரிப்பு நிலையங்கள் அமைக்கப்படும். முதல்வா் விரைவில் விவசாயக் கடன் தள்ளுபடி குறித்து அறிவிப்பாா் என்றாா்.

இதில், அந்தியூா்சட்டப் பேரவை உறுப்பினா் ராஜாகிருஷ்ணன், கோபி கோட்டாட்சியா் ஜெயராமன், வட்டாட்சியா் விஜயகுமாா், வேளாண்மைத் துறை துணை இயக்குநா் ஆசைத்தம்பி, வட்டார வளா்ச்சி அலுவலா்கள் சுமதி, முகமதுபஹீா் உள்ளிட்டோா் கலந்துகொண்டனா்.