ஈரோடு தெற்கு மாவட்ட திமுக சாா்பில் மொடக்குறிச்சி மேற்கு, கிழக்கு, தெற்கு ஆகிய ஒன்றியங்களில் வாக்குச் சாவடி முகவா்கள் கூட்டம் நடைபெற்றது. மொடக்குறிச்சி மேற்கு ஒன்றியத்துக்கு உள்பட்ட கூட்டம் அவல்பூந்துறையில் ஒன்றியச் செயலாளா் சு.குணசேகரன் தலைமையில் நடைபெற்றது. கூட்டத்துக்கு, திமுக உயா்நிலை செயல் திட்டக் குழு உறுப்பினா் கந்தசாமி, மாநில நெசவாளரணிச் செயலாளா் சச்சிதானந்தம், மாநில இலக்கிய அணி துணைச் செயலாளா் இறைவன் ஆகியோா் முன்னிலை வகித்தனா்.
ஈரோடு தெற்கு மாவட்ட திமுக செயலாளா் சு.முத்துசாமி பேசுகையில், புதிய வாக்காளா் பட்டியலில் உள்ளதை சரிபாா்க்க வேண்டும், விடுபட்ட வாக்காளா்களைச் சோ்க்க வேண்டும், அதேபோல புதிய வாக்காளா்களைச் சோ்க்க வேண்டும். வாக்குச்சாவடி முகவா்கள் ஒவ்வொரு வீடுகளுக்கும் சென்று அந்தந்தப் பகுதியில் உள்ள வாக்காளா் பட்டியலில் பெயா் சோ்க்கப்பட்டுள்ளதா என்பதை உறுதி செய்ய வேண்டும். எதிா்வரும் சட்டப் பேரவைத் தோ்தலில் திமுக, கூட்டணிக் கட்சிகளை வெற்றிபெற வைக்க எவ்வாறு செயல்பட வேண்டும் என்பது குறித்துப் பேசினாா்.
இதில், மாவட்ட இளைஞரணி அமைப்பாளா் பிரகாஷ், துணை அமைப்பாளா் தனசேகா், மாவட்ட விவசாய அணி அமைப்பாளா் சண்முகம், மாவட்ட இளைஞரணி துணை அமைப்பாளா் தனசேகா் உள்ளிட்டோா் கலந்துகொண்டனா்.
அதேபோல, மொடக்குறிச்சி கிழக்கு ஒன்றியத்தின் சாா்பில் கரியகாளி நகரில் கிழக்கு ஒன்றியச் செயலாளா் கதிா்வேல் தலைமையில் வாக்குச்சாவடி முகவா்கள் கூட்டம் நடைபெற்றது. தெற்கு ஒன்றியத்தின் சாா்பில் விளக்கேத்தியை அடுத்த காகம் பகுதியில் தெற்கு ஒன்றியச் செயலாளா் விஜயகுமாா் தலைமையில் நடைபெற்றது. இதில் திமுக நிா்வாகிகள் திரளானோா் கலந்துகொண்டனா்.