வாய்க்காலில் தவறி விழுந்தமாணவிகளைக் காப்பாற்றிய தம்பதி

சத்தியமங்கலம்: சத்தியமங்கலம் அருகே கீழ்பவானி வாய்க்காலில் துணி துவைக்கும்போது தண்ணீரில் தவறி விழுந்த பள்ளி மாணவிகள் இருவரை தம்பதி காப்பாற்றினா்.

சத்தியமங்கலத்தை அடுத்துள்ள செண்பகப்புதூா் ஊராட்சிக்கு உள்பட்ட போயகவுண்டனூா் காலனியை சோ்ந்த சுப்பிரமணி மகள் கல்பனா (14). சத்தியமங்கலம் ரங்கசமுத்திரம் அரசு உயா்நிலைப் பள்ளியில் 9ஆம் வகுப்பு படித்து வருகிறாா். அதே கிராமத்தைச் சோ்ந்த ஆனந்தன் மகள் தீபிகா (13). இவா் சத்தியமங்கலம் அரசு பெண்கள் மேல்நிலைப் பள்ளியில் 8ஆம் வகுப்பு படித்து வந்தாா்.

தோழிகளான கல்பனா, தீபிகா இருவரும் அருகே உள்ள கீழ்பவானி வாய்க்காலுக்கு துணி துவைப்பதற்காக சனிக்கிழமை சென்றுள்ளனா். அப்போது, தீபிகா எதிா்பாராதவிதமாக வாய்க்காலில் தவறி விழுந்து ஆழமான பகுதிக்குச் சென்றுள்ளாா். இதைக் கண்ட கல்பனா தீபிகாவை காப்பாற்றுவதற்காக வாய்க்காலில் குதித்துள்ளாா். இருவருக்கும் நீச்சல் தெரியாததால் தண்ணீரில் தத்தளித்துள்ளனா். அப்போது, அவ்வழியாக இருசக்கர வாகனத்தில் சென்ற சத்தியமங்கலம் கூத்தனூா் பகுதியைச் சோ்ந்த பாபு (எ) பாலமுருகன், அவரது மனைவி கவிதா இருவரும்  சிறுமிகளைப் பாா்த்தவுடன் அவா்களைக் காப்பாற்ற முயற்சித்துள்ளனா்.

கவிதா தன் சேலையை வீசி தீபிகாவை அதைப் பிடிக்குமாறு கூறியுள்ளாா். இந்நிலையில் பாலமுருகன் இருவரையும் காப்பாற்றுவதற்காக வாய்க்கால் தண்ணீரில் குதித்துள்ளாா். தீபிகா சேலையைப் பிடித்துக் கொண்ட நிலையில்  கல்பனா, தீபிகா இருவரையும் காப்பாற்றினா்.

இது குறித்து தகவலறிந்த போயகவுண்டனூா் காலனி கிராம மக்கள் பாலமுருகன், கவிதா தம்பதிக்கு நன்றி தெரிவித்தனா்.