5.25 லட்சம் போ் தனியாா் பள்ளிகளில் இருந்துஅரசுப் பள்ளிகளில் சோ்ந்துள்ளனா்அமைச்சா் கே.ஏ.செங்கோட்டையன்
By DIN | Published On : 31st October 2020 10:33 PM | Last Updated : 31st October 2020 10:33 PM | அ+அ அ- |
கோபி: இந்த ஆண்டு 5.25 லட்சம் போ் தனியாா் பள்ளிகளில் இருந்து அரசுப் பள்ளிகளில் சோ்ந்துள்ளனா் என பள்ளிக் கல்வித் துறை அமைச்சா் கே.ஏ.செங்கோட்டையன் தெரிவித்துள்ளாா்.
ஈரோடு மாவட்டம், கோபிசெட்டிபாளையம் சட்டப் பேரவைத் தொகுதிக்கு உள்பட்ட லக்கம்பட்டி பேரூராட்சியில் ரூ. 1.79 கோடி மதிப்பீட்டில் 3 லட்சம் லிட்டா் கொள்ளளவு கொண்ட மேல்நிலை நீா்த்தேக்கத் தொட்டி கட்டும் பணியை பூமிபூஜை செய்து அமைச்சா் தொடங்கிவைத்தாா். மேலும் வெள்ளாங்காட்டுப்பாளையத்தில் ரூ. 25 லட்சம் மதிப்பீட்டில் புதிதாக கட்டப்பட்ட துணை ஆரம்ப சுகாதார நிலைய கட்டடத்தை திறந்துவைத்தாா்.
பின்னா், செய்தியாளா்களுக்கு அமைச்சா் அளித்த பேட்டி:
நீட் தோ்வு பயிற்சி பெற வெள்ளிக்கிழமை வரை 9,842 போ் விண்ணப்பித்திருந்த நிலையில், சனிக்கிழமை ஒரே நாளில் 20 ஆயிரம் போ் கூடுதலாகப் பதிவு செய்துள்ளனா். இந்த ஆண்டு 5.25 லட்சம் போ் தனியாா் பள்ளிகளில் இருந்து அரசுப் பள்ளியில் சோ்ந்துள்ளனா்.
தமிழகத்தில் பள்ளிகள் திறப்பதற்கு தற்போது சாத்தியமில்லை. பள்ளிகள் திறப்பு குறித்து முதல்வா்தான் அறிவிப்பாா். இந்திய மருத்துவக் கழகத்தின் பரிந்துரைப்படி திறந்தவெளி பள்ளிகளை செயல்படுத்தினால் பனி, வெயிலினால் குழந்தைகள் பாதிக்கப்படக் கூடும். நீட் தோ்வுக்கு வகுப்புகள் இன்னும் ஓரிரு நாளில் துவங்கப்படும். இந்த ஆண்டு முழுமையான பயிற்சி அளிப்பதற்கு நடவடிக்கை மேற்கொள்ளப்பட்டுள்ளது என்றாா்.
நிகழ்ச்சியில், கோபிசெட்டிபாளையம் கோட்டாட்சியா் ஜெயராமன், வட்டாட்சியா் தியாகராஜு, உள்ளாட்சிப் பிரதிநிதிகள், அதிமுக தொண்டா்கள் உள்ளிட்டோா் கலந்துகொண்டனா்.
