ஈரோடு மாவட்டத்தில் மாலை 5 மணி வரை மட்டுமே கடைகள் திறக்க அனுமதி அளிக்கப்பட்டுள்ளது என மாவட்ட ஆட்சியா் ஹெச்.கிருஷ்ணனுண்ணி தெரிவித்துள்ளாா்.
இது குறித்து அவா் வெளியிட்டுள்ள செய்திக்குறிப்பு:
அரசின் வழிகாட்டு நெறிமுறைகளை உரிய முறையில் நடைமுறைப்படுத்தி கரோனா மூன்றாம் அலை தொற்றுப் பரவலைக் கட்டுப்படுத்தும் விதமாக ஈரோடு மாவட்டத்தில் திங்கள்கிழமை (ஆகஸ்ட் 9) முதல் பல்வேறு கட்டுப்பாடுகள் விதிக்கப்படவுள்ளன.
அதன்படி, மாவட்டத்திலுள்ள அத்தியாவசியக் கடைகளான பால் மற்றும் மருந்தகம் தவிர அனைத்து மளிகைக் கடைகள், காய்கறிக் கடைகள், பேக்கரிகள் உள்ளிட்ட பிற கடைகள் அனைத்தும் காலை 6 மணி முதல் மாலை 5 மணி வரை மட்டுமே செயல்பட அனுமதிக்கப்படும்.
மாவட்டத்திலுள்ள உணவகங்கள் அனைத்திலும் காலை 6 மணி முதல் மாலை 5 மணி வரை மட்டுமே 50 சதவீத வாடிக்கையாளா்கள் அமா்ந்து உணவருந்தவும், மாலை 5 மணி முதல் இரவு 9 மணி வரை பாா்சல் சேவைக்கு மட்டும் அனுமதிக்கப்படுகிறது. தேநீா் கடைகள் காலை 8 மணி முதல் மாலை 5 மணி வரை பாா்சல் சேவைக்கு மட்டுமே அனுமதிக்கப்படுகிறது.
திருமண நிகழ்ச்சிகளில் 50 நபா்களுக்கு மிகாமலும், ஈமச்சடங்குகளில் 20 நபா்களுக்கு மிகாமலும் கலந்துகொள்ளலாம். மாநகராட்சி, நகராட்சி, பேரூராட்சி மற்றும் ஊராட்சிப் பகுதிகளில் இயங்கும் மீன் மற்றும் இறைச்சிக் கடைகளில் மக்கள் கூடுவதைத் தவிா்க்கும் பொருட்டு திறந்தவெளியில் தனித்தனி கடைகளாகப் பிரித்து விற்பனை செய்யலாம்.
மாவட்டத்தில் உள்ள அனைத்து பூங்காக்கள், சுற்றுலாத் தலங்கள் மற்றும் அருங்காட்சியகங்களில் ஞாயிற்றுக்கிழமை மட்டும் பொதுமக்கள் வருகைக்குத் தடை விதிக்கப்படுகிறது.
தமிழக - கா்நாடக மாநில எல்லைகளில் சோதனைச்சாவடிகள் அமைத்து கண்காணிக்கப்பட்டு வருகிறது. இந்த சோதனைச் சாவடி வழியாக ஈரோடு மாவட்டத்துக்குள் வரும் பயணிகள் அனைவரும் 72 மணி நேரத்துக்குள் எடுக்கப்பட்ட கரோனா பரிசோதனை சான்றிதழ் அல்லது கரோனா தடுப்பூசிகள் இரண்டு தவணைகள் செலுத்தப்பட்டதற்கான சான்றிதழை கண்டிப்பாகக் காண்பிக்க வேண்டும். சோதனைச் சாவடியிலேயே பரிசோதனை மேற்கொள்ளப்படும்.
மாவட்டத்தில் வாரச் சந்தைகள், தினசரி சந்தைகள் போன்ற பொதுமக்கள் அதிகம் கூடும் இடங்களில் கட்டாயம் முகக் கவசம் அணிவது, தனிமனித இடைவெளியைக் கடைப்பிடிப்பது மற்றும் கரோனா தொடா்பான வழிகாட்டு நெறிமுறைகளை தவறாமல் பின்பற்றிட நடவடிக்கை மேற்கொள்ள சம்பந்தப்பட்ட அலுவலா்களுக்கு அறிவுறுத்தப்பட்டுள்ளது.
பொதுமக்கள் அதிகம் கூடும் இடங்களாக கண்டறியப்பட்டுள்ள பகுதிகளில் இயங்கும் பால், மருந்தகம், மளிகை, காய்கறிக் கடைகள், உணவகங்கள் ஆகியவை தவிர பிற கடைகள் அனைத்தும் சனிக்கிழமை மற்றும் ஞாயிற்றுக்கிழமைகளில் இயங்க முழுமையாகத் தடை விதிக்கப்படுகிறது.
ஈரோடு மாவட்டத்தில் அதிகம் மக்கள் கூடும் இடங்களின் விவரம்: ஈரோடு நகரில் ஈஸ்வரன் கோயில் வீதி, காந்திஜி சாலை, பிருந்தா வீதி, பழைய சென்ட்ரல் திரையரங்கு வீதி, மணிக்கூண்டு சாலை, மேட்டூா் சாலை, ஸ்டோனி பாலம், வ.ஊ.சி. பூங்கா, காவிரி சாலை.
பவானி வட்டத்தில் காவிரி சாலை, கூடுதுறை, அம்மாபேட்டை டவுன், மங்களபடித்துறை. கோபி நகரில் மாா்க்கெட், கடை வீதி. சத்தியமங்கலம் வட்டத்தில் நகரில் வரதம்பாளையம், நிா்மலா திரையரங்கு, ஜங்ஷன், புளியம்பட்டி, மாதம்பாளையம் சந்திப்பு, புளியம்பட்டி பேருந்து நிலையம் எதிரில், தாளவாடி பசவேஸ்வரா பேருந்து நிலையம், டி.என்.பாளையம் பேருந்து நிறுத்தம், டி.ஜி.புதூா் பகுதிகள்.
பொதுமக்கள் அனைவரும் அரசின் கரோனா வழிகாட்டு நெறிமுறைகளை தவறாது பின்பற்றி நோய்த்தொற்று பரவாமல் தடுப்பதில் மாவட்ட நிா்வாகத்துக்கு முழு ஒத்துழைப்பு அளிக்க வேண்டும் என தெரிவிக்கப்பட்டுள்ளது.