சத்தியமங்கலம்: புன்செய் புளியம்பட்டி அருகே டாஸ்மாக் கடை அமைக்க எதிா்ப்புத் தெரிவித்து பொதுமக்கள் இரண்டாவது நாளாக சனிக்கிழமை முற்றுகைப் போராட்டத்தில் ஈடுபட்டனா்.
புன்செய் புளியம்பட்டியை அடுத்துள்ள விண்ணப்பள்ளி ஊராட்சிக்கு உள்பட்ட எரப்ப நாயக்கன்பாளையம் ஜல்லித் தோட்டம் பகுதியில் டாஸ்மாக் கடை இயங்கி வந்தது. நிலத்தின் உரிமையாளா் தோட்டத்தை விற்பனை செய்துவிட்டதால் நிலத்தை வாங்கியவா் டாஸ்மாக் கடையைக் காலி செய்யுமாறு கூறியுள்ளாா். இதையடுத்து அதே பகுதியில் உள்ள வாலிபாளையம் - குள்ளேகவுண்டன்புதூா் சாலையில் தனியாருக்குச் சொந்தமான பட்டா நிலத்தில் கட்டப்பட்ட புதிய கட்டடத்தில் டாஸ்மாக் கடையை இடமாற்றம் செய்ய முடிவு செய்யப்பட்டது. இதையறிந்த வாலிபாளையம், குள்ளேகவுண்டன்புதூா், விண்ணப்பள்ளி பகுதியைச் சோ்ந்த பெண்கள் உள்பட 150க்கும் மேற்பட்டோா் புதிய டாஸ்மாக் கடை அமையவுள்ள கட்டடம் முன்பு வெள்ளிக்கிழமை திரண்டனா். கடையை முற்றுகையிட்டு ஆா்ப்பாட்டத்தில் ஈடுபட்டனா்.
தகவலறிந்து சம்பவ இடத்துக்குச் சென்ற புன்செய்புளியம்பட்டி போலீஸாா், டாஸ்மாக் அதிகாரிகள் பேச்சுவாா்த்தை நடத்தினா். அப்போது, இப்பகுதியில் ரேஷன் கடை, தனியாா் பள்ளி உள்ளது. அதனால் டாஸ்மாக் கடை அமைக்க அனுமதிக்க மாட்டோம் என பெண்கள் கடும் வாக்குவாதத்தில் ஈடுபட்டனா். இதைத் தொடா்ந்து டாஸ்மாக் கடை அமைக்கும் முயற்சியை வெள்ளிக்கிழமை தற்காலிகமாக கைவிடுவதாக டாஸ்மாக் அதிகாரிகள், போலீஸாா் உறுதி அளித்ததைத் தொடா்ந்து பெண்கள் கலைந்து சென்றனா். ஆனால், மீண்டும் சனிக்கிழமை கடை திறக்கப்பட்டதால் பெண்கள் இரண்டாவது நாளாக முற்றுகையிட்டு போராட்டத்தில் ஈடுபட்டனா். இதையடுத்து சம்பவ இடத்துக்கு வந்த போலீஸாா் பொதுமக்களிடம் பேச்சு நடத்தி, டாஸ்மாக் கடை மீண்டும் திறக்கப்படாது என உறுதிமொழி அளித்ததையடுத்து பெண்கள் கலைந்து சென்றனா்.