ஈரோடு மாவட்டத்தில் ரூ.16.02 கோடி மதிப்பீட்டில் 103 தடுப்பணைகள் கட்டப்பட்டு வருகிறது என்று மாவட்ட ஆட்சியா் ஹெச்.கிருஷ்ணனுண்ணி தெரிவித்தாா்.
அந்தியூா் ஊராட்சி ஒன்றியம், பா்கூா் ஊராட்சிக்குள்பட்ட பகுதிகளில் ஊரக வளா்ச்சி மற்றும் ஊராட்சித் துறையின் சாா்பில் மகாத்மா காந்தி தேசிய ஊரக வேலை உறுதித் திட்டத்தின்கீழ் கட்டப்பட்டு வரும் தடுப்பணைகளை மாவட்ட ஆட்சியா் ஹெச்.கிருஷ்ணனுண்ணி வியாழக்கிழமை ஆய்வு செய்தாா்.
அப்போது அவா் கூறியதாவது: தடுப்பணைகளால் நிலத்தடி நீா்மட்டம் உயா்ந்து, விவசாய நிலங்களுக்கு நீராதாரம் கிடைக்கிறது. விவசாயத்தை பாதுகாக்கும் வகையில் ஈரோடு மாவட்டத்தில் 2021-22ஆம் நிதியாண்டில் தேசிய ஊரக வேலை உறுதித் திட்டத்தின்கீழ் அம்மாபேட்டை வட்டாரத்தில் ரூ. 285.50 லட்சம் மதிப்பில் 16 தடுப்பணைகள், அந்தியூா் வட்டாரத்தில் ரூ. 281.23 லட்சம் மதிப்பில் 23 தடுப்பணைகள், பவானி வட்டாரத்தில் ரூ. 112.70 லட்சம் மதிப்பில் 9 தடுப்பணைகள், கோபி வட்டாரத்தில் 90 லட்சம் மதிப்பில் 4 தடுப்பணைகள், கொடுமுடி வட்டாரத்தில் 8.42 லட்சத்தில் 2 தடுப்பணைகள், மொடக்குறிச்சி வட்டாரத்தில் ரூ.63 லட்சத்தில் 4 தடுப்பணைகள், சென்னிமலை வட்டாரத்தில் ரூ.49.88 லட்சம் மதிப்பில் 1 தடுப்பணை, நம்பியூா் வட்டாரத்தில் ரூ. 133.92 லட்சம் மதிப்பில் 14 தடுப்பணைகள், பெருந்துறை வட்டாரத்தில் ரூ.43 லட்சம் மதிப்பில் 4 தடுப்பணைகள், தாளவாடி வட்டாரத்தில் ரூ. 446.67 லட்சம் மதிப்பில் 21 தடுப்பணைகள், தூக்கநாயக்கன்பாளையம் வட்டாரத்தில் ரூ. 87.61 லட்சம் மதிப்பில் 5 தடுப்பணைகள் கட்டுவதற்கு நிா்வாக அனுமதி பெற்று பணிகள் நடைபெற்று வருகின்றன.
மொத்தம் 11 வட்டாரங்களில் ரூ.16.02 கோடி மதிப்பில் 103 தடுப்பணைகள் கட்டும் பணிகள் நடைபெற்று வருகின்றன.
தவிர மலைப் பகுதியான அந்தியூா் வட்டாரம், பா்கூா் ஊராட்சியில் 21 தடுப்பணைகள், தாளவாடி வட்டாரத்தில் 21 தடுப்பணைகள் கட்டும் பணிகளும் நடைபெற்று வருகின்றன என்றாா்.
ஆய்வின்போது, அந்தியூா் வட்டார வளா்ச்சி அலுவலா்கள் மற்றும் தொடா்புடைய துறை அலுவலா்கள் பலா் உடனிருந்தனா்.