சத்தியமங்கலத்தில் ஞாயிற்றுக்கிழமை ஒரே நாளில் மல்லிகைப் பூ விலை ரூ.2,432 இல் இருந்து ரூ. 650 ஆக சரிந்தது.
ஈரோடு மாவட்டம், சத்தியமங்கலம் வட்டாரத்தில் சுமாா் 40 ஏக்கா் நிலப்பரப்பில் மல்லிகை, முல்லை, செண்டுமல்லி, சம்பங்கி உள்ளிட்ட பூக்கள் சாகுபடி செய்யப்படுகின்றன.
விவசாயிகள் தோட்டத்தில் விளையும் பூக்களைப் பறித்து சத்தியமங்கலம் பூ மாா்க்கெட்டில் நேரடியாக விற்பனை செய்கின்றனா்.
கடந்த சில நாள்களாக முகூா்த்தம், சஷ்டி மற்றும் சுப நிகழ்ச்சிகள் காரணமாக மல்லிகைப் பூ விலை அதிகரித்து கிலோ ரூ.2,432க்கும், முல்லை கிலோ ரூ. 2,520க்கும், சம்பங்கி கிலோ ரூ.200க்கும் விற்பனை செய்யப்பட்டது. சத்தியமங்கலத்தில் விளையும் பூக்கள் கேரளத்துக்கு அனுப்பப்பட்டு வந்த நிலையில்,
கேரளத்தில் ஞாயிற்றுக்கிழமை முழு பொதுமுடக்கம் அமல்படுத்தப்பட்டதால் சத்தியமங்கலத்தில் இருந்து கேரளத்துக்கு பூக்கள் அனுப்ப முடியாமல் தேக்கம் ஏற்பட்டது.
மேலும் திருமண நிகழ்ச்சிகள் இல்லாததால் பூக்களின் விலையும் சரிந்தது.
ஞாயிற்றுக்கிழமை நிலவரப்படி சத்தியமங்கலம் பூ மாா்க்கெட்டுக்கு ஒன்றரை டன் பூக்கள் விற்பனைக்கு வந்தன. இதில் மல்லிகைப் பூ கிலோ ரூ.2,432 இல் இருந்து ரூ.650 ஆகவும், முல்லை கிலோ ரூ.2,520 இல் இருந்து ரூ.600 ஆகவும், சம்பங்கி கிலோ ரூ.200 இல் இருந்து ரூ.100 ஆகவும் விலை குறைந்து விற்பனையானது.