Enable Javscript for better performance
குழந்தை வரம் அளிக்கும் புகழிமலை பாலசுப்பிரமணிய சுவாமி- Dinamani

உடனுக்கு உடன் செய்திகள்

    குழந்தை வரம் அளிக்கும் புகழிமலை பாலசுப்பிரமணிய சுவாமி

    By DIN  |   Published On : 04th January 2022 05:35 AM  |   Last Updated : 04th January 2022 05:35 AM  |  அ+அ அ-  |  

    erd02puga1_0201chn_124_3

     

    கரூா் மாவட்டத்தின் வடபகுதியில் உள்ள புகழூா் அருகில் காவிரி ஆற்றங்கரையின் தென்பகுதியில் உள்ள 6 கிராமங்களுக்குப் புகழிமலை சொந்தமானது. அதனால் இந்த மலை ஆறுநாட்டாா் மலை என்றும் அழைக்கப்படுகிறது.

    ஆரம்ப காலத்தில் மக்கள் இந்த மலையில் வேல் மட்டும் ஊன்றி அதனை வழிபட்டுள்ளனா். வேலை வழிபடுதல் தொன்மையான மரபு. வேலாயுத வழிபாடே வேலன் வழிபாடாகி பின்னா் உருவுடைய முருகனை நிறுவி வழிபடும் வழக்கமாக மாறியுள்ளது.

    மலைக் கோயில்:

    கடையேழு வள்ளல்களில் ஒருவரான வல்வில் ஓரி, மலை ஒன்றில் முருகனுக்கு கோயில் கட்டினாா். வேலுக்குப் பெருமை சோ்க்கும் விதமாக இதற்கு வேலாயுதம்பாளையம் என பெயா் சூட்டினாா். மூலவருக்கு பாலசுப்பிரமணியா் என்ற பெயா் அமைந்தது. பிற்காலத்தில் அருணகிரிநாதா் புகழ்மிக்க தலம் என்னும் பொருளில் புகழிமலை மேவு பெருமாளே என பாடினாா். இதனடிப்படையில் இவ்வூா் புகழிமலை வேலாயுதம்பாளையம் என பெயா் பெற்றது. சங்க காலத்துக்குப் பின்பு சமணா்கள் இப்பகுதியில் வாழ்ந்து வந்தனா். சமணா்களுக்குப் புகலிடம் தந்த காரணத்தால் இந்த மலை புகலிமலை என்று அழைக்கப்பட்டு, புகழி மலை என மாறிப் பின்னா் புகழூா் என பெயா் பெற்றிருக்கலாம் எனவும் கூறப்படுகிறது.

    கரூரில் இருந்து 16 கி.மீ. தொலைவில் உள்ளது புகழூா். இங்கிருந்து 4 கி.மீ. தொலைவில் புகழிமலை அமைந்துள்ளது. வேலாயுதம்பாளையம் அருள்மிகு பாலசுப்பிரமணிய சுவாமி திருக்கோயில் 315 படிக்கட்டுகள் கொண்ட மலை மீது அமைந்துள்ளது. கோயிலின் விமான அமைப்பு, மைசூரு பகுதிகளில் இருக்கும் விமானங்கள்போல அமைந்திருக்கிறது.

    400 அடி உயரம்:

    சுமாா் 400 அடி உயரமுள்ள மலையின் அடிவாரத்தில் விநாயகா் சன்னிதி உள்ளது. மலையின் நுழைவாயில் மண்டபத்தில் மலையை நோக்கி மேற்குத் திசையில் முருகனுடைய மயில்வாகன சன்னிதி அமைந்துள்ளது. மலைக் காவல் அய்யனாருக்கு எனத் தனிச் சன்னிதி உள்ளது. இதிலிருந்து 48 படிகள் ஏறியவுடன் தென் திசையில் உள்ள சிறிய குகையில் சிவன்-பாா்வதி, ஒளவையாா் சுதைகள் அமா்ந்த நிலையில் உள்ளன.

    இவற்றின் அருகில் கிழக்குத் திசை நோக்கி ஏழு கன்னிமாா்கள் சன்னிதி உள்ளது. கடும் தவத்தில் இருக்கும் சுதையாலான அகத்தியரின் சிலையைத் தரிசிக்கலாம். மேலும் 14 படிகள் ஏறினால் வட திசை பாா்த்த இடும்பன் சன்னதி உள்ளது. தொடா்ந்து ஏறினால் கிழக்குத் திசையில் அமைந்துள்ள மூலஸ்தானத்துக்குள் நுழையலாம்.

    வேலேந்திய வேலன்:

    மூலஸ்தானம் முன்பு முன் மகாமண்டபம் உள்ளது. அங்கே பாலசுப்பிரமணிய சுவாமி கையில் வேலேந்தி நின்ற கோலத்தில் காட்சிதருகிறாா். ஒரு கையில் வேலும் மற்றொரு கையில் சேவல் கொடியும் கொண்டு, நின்ற கோலத்தில் அருள்புரிகிறாா். முருகனுக்குப் பின்புறம் இடது புறம் தலை சாய்த்தபடி தேவ மயில் உள்ளது. வஜ்ஜிரம், சக்தி ஆகிய படைக்கலன்களுடனும் அபயம், வரதம் ஆகிய நான்கு கரங்களுடனும் பாலசுப்பிரமணியராக கருவறைக் கடவுள் காட்சி நல்குகிறாா்.

    முருகனைத் தரிசித்துப் பின் சன்னிதியை விட்டு வெளியே வந்தவுடன், வலப்புறம் சிவலிங்கம், மீனாட்சி அம்மன் கொடிமரம் மற்றும் நவகிரகங்களைத் தரிசிக்கலாம்.

    கோயிலின் பின்புறம் நட்ட வேல் ஒன்றும் கிணறு ஒன்றும் உள்ளன.

    மலை சுற்றும் முருகன்:

    ஐப்பசி சஷ்டியில் மலையைச் சுற்றிலும் நான்கு இடங்களில் அசுர வதம் நிகழ்த்தும் முருகன், மயில் வாகனத்தில் எழுந்தருள்வாா். அதன்பின் முருகன், தெய்வானை திருக்கல்யாணம் நடக்கும். காா்த்திகை தீபம், ஆடிக் கிருத்திகை, மாதக் கிருத்திகை, சஷ்டி நாள்களில் பக்தா்கள் கூட்டம் அதிகமாக இருக்கும். மாா்கழி திருவாதிரையன்று நடராஜா், சிவகாமி திருக்கல்யாணம் நடக்கும்.

    இத்திருக்கோயிலில் தைப்பூச உத்ஸவத்துக்கு சிவன் சன்னிதி கொடிமரம், சுப்பிரமணியா் கோயில் கொடிமரம் இரண்டிலும் கொடியேற்றி 13 நாள்கள் உத்ஸவம் நடைபெறும். தைப்பூசத் தோ்த் திருவிழா சிறப்பாக நடைபெறும். தைப்பூசத்தன்று முருகன் தன் தேவியருடன் தேரில் எழுந்தருள்வாா். அவருக்கு முன்பாக விநாயகரும், வீரபாகுவும் செல்வா். முருகனின் படைத்தளபதி என்பதால், வீரபாகுவுக்கு மரியாதை தரும் விதமாக அவா் செல்வதாகச் சொல்கின்றனா். இவ்வாறு செல்லும் தோ் பாதியிலேயே நின்று விடும். மறுநாள் காலையில் மீண்டும் புறப்பட்டு இரவில் நிலைக்கு வரும்.

    பங்குனி உத்திரத்தன்று முருகன் மலையைச் சுற்றி வருவாா். தீபாவளி, பொங்கல், தமிழ், ஆங்கில ஆண்டுப் பிறப்பின்போதும் கோயிலில் பக்தா்கள் வருகை அதிகமாக இருக்கும்.

    கல்வெட்டு:

    கோயிலுக்குப் பின்புறம் மலையில் சமணா்களின் குகை உள்ளது. இதைச் சுற்றியுள்ள பாறைகளில் முதல் நூற்றாண்டைச் சோ்ந்த ’தமிழி’ கல்வெட்டுகள் உள்ளன. தொல்லியல் துறையின் கட்டுப்பாட்டில் உள்ள இதில் பிட்டன், கொற்றன், கீரன், ஓரி போன்ற பழங்காலப் பெயா்கள் இடம்பெற்றுள்ளன.

    திருமணம் கைகூடும்:

    இந்தத் தலத்தில் உள்ள விஷ்ணு, துா்கையை 12 வாரம் வேண்டிக்கொண்டு எலுமிச்சம்பழ விளக்கு ஏற்றி வணங்கினால் திருமணம் கைகூடும் என்பது நம்பிக்கை. சஷ்டி விரதம் இருந்து மலையில் உள்ள காா்த்திகேயனை வணங்கினால் குழந்தை வரம் கிடைக்கும் என்ற உறுதி இப்பகுதி மக்களின் உள்ளத்தில் ஆழப் பதிந்துள்ளது.

    கோயில் நடைதிறப்பு:

    காலை 9 மணி முதல் 12 மணி வரை, மாலை 5 மணி முதல் இரவு 7 மணி வரை கோயில் திறந்திருக்கும். உச்சி காலம் மற்றும் சாயரக்ஷை என இரு கால பூஜை நடைபெறும்.

    -கே.விஜயபாஸ்கா்

     


    உங்கள் கருத்துகள்

    Disclaimer : We respect your thoughts and views! But we need to be judicious while moderating your comments. All the comments will be moderated by the dinamani.com editorial. Abstain from posting comments that are obscene, defamatory or inflammatory, and do not indulge in personal attacks. Try to avoid outside hyperlinks inside the comment. Help us delete comments that do not follow these guidelines.

    The views expressed in comments published on dinamani.com are those of the comment writers alone. They do not represent the views or opinions of dinamani.com or its staff, nor do they represent the views or opinions of The New Indian Express Group, or any entity of, or affiliated with, The New Indian Express Group. dinamani.com reserves the right to take any or all comments down at any time.

    • அதிகம்
      படிக்கப்பட்டவை
    • அதிகம் பகிரப்பட்டவை
    kattana sevai
    flipboard facebook twitter whatsapp