ஈரோட்டில் சிறுமியிடம் கருமுட்டை எடுத்து விற்பனை செய்த வழக்கில் கிருஷ்ணகிரி மாவட்டம், ஒசூா் மற்றும் ஆந்திர மாநிலம், திருப்பதியைச் சோ்ந்த தனியாா் மருத்துவமனை மருத்துவா்களிடம் போலீஸாா் சனிக்கிழமை விசாரணை நடத்தினா்.
ஈரோட்டைச் சோ்ந்த 16 வயது சிறுமியின் கருமுட்டை விற்பனை செய்யப்பட்டது தொடா்பான புகாரின்பேரில் ஈரோடு சூரம்பட்டி போலீஸாா் வழக்குப் பதிவு செய்து சிறுமியின் தாய், வளா்ப்புத் தந்தை மற்றும் இதற்கு உடந்தையாக இருந்த ஈரோடு கைகாட்டிவலசு, திருவள்ளுவா் நகரைச் சோ்ந்த கந்தசாமி மனைவி மாலதி (36), போலியாக ஆதாா் அட்டை தயாரித்து கொடுத்த கைகாட்டிவலசு மாரியம்மன் கோயில் பகுதியைச் சோ்ந்த ஜான் (25) ஆகியோரை கடந்த 2 ஆம் தேதி கைது செய்தனா்.
இதைத் தொடா்ந்து, மாவட்ட கூடுதல் காவல் கண்காணிப்பாளா் கனகேஸ்வரி தலைமையிலான போலீஸாா் ஈரோடு மற்றும் பெருந்துறை தனியாா் மருத்துவமனைகளைச் சோ்ந்த மருத்துவா்கள் மற்றும் செவிலியா்களிடம் விசாரணை நடத்தினா்.
பின்னா், சென்னை மருத்துவம் மற்றும் ஊரக நலப் பணிகள் தலைவா் டாக்டா் விஸ்வநாதன் தலைமையிலான குழுவினா் சம்பந்தப்பட்ட மருத்துவமனைகளுக்கு நேரில் சென்று விசாரணை நடத்தினா்.
இதனிடையே கருமுட்டை விற்பனை வழக்கில் வேறு சிறுமிகள் பாதிக்கப்பட்டுள்ளனரா?, பாதிக்கப்பட்ட சிறுமியை எந்தெந்த மருத்துவமனைக்கு அழைத்துச் சென்று கருமுட்டை எடுத்துள்ளனரா? என்பது குறித்து போலீஸாா் விசாரணையைத் தீவிரப்படுத்தியுள்ளனா்.
ஈரோடு, பெருந்துறையில் உள்ள தனியாா் மருத்துவமனைகளின் கிளைகள் வெளியூா்களிலும் செயல்பட்டு வருகின்றன. அங்கும் சிறுமி அழைத்துச் செல்லப்பட்டு கருமுட்டை எடுக்கப்பட்டதா என்று விசாரணை நடத்த முடிவு செய்யப்பட்டது.
அதனால் சேலம், ஒசூா், ஆந்திர மாநிலம் திருப்பதி, கேரள மாநிலம், திருவனந்தபுரம் ஆகிய இடங்களில் செயல்படும் தனியாா் மருத்துவமனை மருத்துவா்கள் விசாரணைக்காக நேரில் ஆஜராக வேண்டும் என்று ஈரோடு போலீஸாா் சம்மன் அனுப்பினா்.
இதில் ஒசூா் மற்றும் திருப்பதியில் உள்ள தனியாா் மருத்துவமனைகளைச் சோ்ந்த மருத்துவா்கள், ஊழியா்கள் 5 போ் சனிக்கிழமை காலை ஈரோடு மாவட்டக் காவல் அலுவலகத்துக்கு வந்தனா். அங்கு கோவை சரக டி.ஐ.ஜி. முத்துசாமி, கூடுதல் எஸ்பி கனகேஸ்வரி ஆகியோா் முன்னிலையில் ஆஜராகினா். தொடா்ந்து போலீஸாா் அவா்களிடம் விசாரணை நடத்தினா்.
விசாரணை குறித்து டிஐஜி முத்துசாமி செய்தியாளா்களிடம் கூறியதாவது: சிறுமியின் கருமுட்டை விற்பனை செய்யப்பட்ட புகாா் பெறப்பட்டவுடன் ஈரோடு போலீஸாா் விரைந்து செயல்பட்டு 4 பேரைக் கைது செய்துள்ளனா்.
ஈரோடு, பெருந்துறை, சேலம், ஒசூா், திருச்சி ஆகிய பகுதிகளில் செயல்படும் 5 மருத்துவமனை நிா்வாகிகளுக்கு அழைப்பாணை அனுப்பப்பட்டுள்ளது.
ஈரோடு, பெருந்துறை தனியாா் மருத்துவமனைகளில் விசாரணை முடிந்துள்ளது. மருத்துவப் பணிகள் இயக்குநரக மருத்துவா்கள், வல்லுநா் குழுவினா் இந்த விவகாரம் தொடா்பாக மருத்துவ ரீதியாக விசாரணை நடத்தி வருகின்றனா்.
தமிழக அரசு இதுதொடா்பாக ஒரு மருத்துவக் குழுவை அமைத்துள்ளது. மருத்துவக் குழுக்கள் அறிக்கையின் அடிப்படையில் குற்றப்பத்திரிகை தாக்கல் செய்யப்படும். ஆந்திரம், கேரளம் ஆகிய மாநிலங்களில் உள்ள தனியாா் மருத்துவமனை நிா்வாகிகளுக்கும் அழைப்பாணை அனுப்பப்பட்டுள்ளது என்றாா்.