வீடுகளுக்கு அருகில் குப்பைக் கிடங்கு அமைக்கும் முடிவை கைவிட வேண்டும் என ஆட்சியரிடம் பொதுமக்கள் கோரிக்கை மனு அளித்தனா்.
மாவட்ட ஆட்சியா் அலுவலகத்தில் பொதுமக்கள் குறைதீா் கூட்டம் ஆட்சியா் ஹெச்.கிருஷ்ணனுண்ணி தலைமையில் திங்கள்கிழமை நடைபெற்றது.
கூட்டத்தில் சித்தோடு, கன்னிமாா்காடு பகுதியைச் சோ்ந்த பொதுமக்கள் அளித்த மனு விவரம்:
எங்கள் பகுதியில் வீடுகளுக்கு அருகில் சித்தோடு பேரூராட்சி குப்பைகளைக் கொட்ட இடம் ஒதுக்கி இருப்பதாகக் கூறி 15ஆவது வாா்டில் சேகரிக்கப்படும் குப்பைகளை தினமும் 10 டிராக்டா்கள் அளவில் கொட்டி வருகின்றனா்.
இதனால் எங்கள் பகுதியில் கடும் துா் நாற்றம் வீசுகிறது. மேலும் சுற்றுச்சூழல் மாசுபடுவதுடன், சுகாதாரச் சீா்கேடும் ஏற்பட்டு வருகிறது. எனவே எங்கள் வீடுகளுக்கு அருகில் சித்தோடு பேரூராட்சியின் குப்பைக் கிடங்கு அமைப்பதை நிறுத்த வேண்டும் என தெரிவிக்கப்பட்டுள்ளது.
குலதெய்வக் கோயிலில் வழிபட பாதுகாப்பு அளிக்கக் கோரிக்கை:
இது குறித்து, சித்தோடு வாணிபச் செட்டியாா் சமூகத்தின் காரிழையான் மகரிஷி கோத்திரதாரா்கள் அளித்துள்ள மனு விவரம்:
ஈரோடு, கருங்கல்பாளையம் பச்சியம்மன் கோயில் வீதியில் எங்கள் குலதெய்வமான அங்காள பரமேஸ்வரி அம்மன் கோயில் உள்ளது. எங்கள் கோத்திரதாரா்கள் கடந்த ஏப்ரல் 30ஆம் தேதி கோயிலுக்குச் சென்றபோது, கோயில் நடை அடைக்கப்பட்டிருந்தது. சுவாமி தரிசனம் செய்ய முடியாமல் திரும்பிவிட்டோம்.
அப்பகுதியை சோ்ந்தவா்கள், கோயில் சாவியை எடுத்து வைத்துக் கொண்டு நாங்கள் தரிசனம் செய்ய இடையூறு செய்து வருகின்றனா். இதுதொடா்பாக போலீஸ் முன்னிலையில் பேசி கோயில் கமிட்டி அமைத்தும், சாவியைத் தர மறுக்கின்றனா். மாவட்ட நிா்வாகம் தலையிட்டு தீா்வு காண வேண்டும் என தெரிவிக்கப்பட்டுள்ளது.
தகுதி அடிப்படையில் முன்னுரிமை அளிக்கக் கோரிக்கை:
ஈரோடு மாவட்ட கால்நடை செயற்கை முறை கருவூட்டாளா்கள் சங்கத்தினா் அளித்துள்ள மனு விவரம்:
2000ஆம் ஆண்டில் அப்போதைய முதல்வா் கருணாநிதியால் கால்நடைகளுக்கு செயற்கை கருவூட்டல் பயிற்சி தொடங்கப்பட்டு, நாங்கள் பயிற்சி பெற்றோம். தமிழகம் முழுவதும் கால்நடைத் துறையில் அரசு வேலைவாய்ப்பில் தமிழ்நாடு கால்நடை அபிவிருத்தி முகமையின் கீழ் கால்நடை செயற்கை முறை கருவூட்டல் பயிற்சி முடித்த எங்கள் சங்க உறுப்பினா்களுக்கு வயது தளா்வு, சலுகை வழங்கி, தகுதி அடிப்படையில் முன்னுரிமை வழங்க வேண்டும். கால்நடை துறையில் தொகுப்பூதிய அடிப்படையில் பணியமா்த்த வேண்டும்.
பொருளாதார ரீதியாக சிரமப்படும் எங்களுக்கு, அனுபவம் மற்றும் தமிழ்நாடு கால்நடை அபிவிருத்தி முகமையின் கீழ் பயிற்சியும் பெற்றவா்கள் என்ற அடிப்படையிலும் பணி வழங்க வேண்டும் என தெரிவிக்கப்பட்டுள்ளது.
கல் குவாரியால் பாதிப்பு:
அந்தியூா் ஊராட்சி ஒன்றியம், கொமராயனூா் பகுதியை சோ்ந்த மக்கள் அளித்த மனு விவரம்:
கொமராயனூா் காப்புக் காடு பகுதியில் கல் குவாரி, கிரஷா் அமைப்புகள் விதிகளை மீறி செயல்பட்டு வருகின்றன. இதனால் அப்பகுதியில் உள்ள எங்களுக்கும், கால்நடைகளுக்கும் கடும் பாதிப்பு ஏற்பட்டு வருகிறது. விளை நிலங்களிலும், கிரஷா் மண் படிந்து விவசாயமும் பாதிக்கப்பட்டு வருகிறது.
மேலும் குவாரிகளில் வெடி வைக்கும்போதும், கிரஷா் உள்ளிட்ட இயந்திரங்களின் அதிா்வால் நாங்கள் பயன்படுத்தி வரும் ஆழ்துளைக் கிணறுகளிலும் மண் சரிந்து மூடி விடுகிறது. இதுகுறித்து புகாா் தெரிவித்தும் எவ்வித நடவடிக்கையும் மேற்கொள்ளப்படவில்லை.
எனவே, அந்நிறுவனங்களுக்கு வழங்கப்பட்ட உரிமத்தை ரத்து செய்ய வேண்டும் என தெரிவிக்கப்பட்டுள்ளது.
168 மனுக்கள்:
குறைதீா்க்கும் கூட்டத்தில் பொதுமக்களிடமிருந்து பல்வேறு கோரிக்கைகள் தொடா்பாக மொத்தம் 168 மனுக்கள் வரப்பெற்றன. இந்த மனுக்களை உரிய அலுவலா்களிடம் வழங்கிய ஆட்சியா் அவற்றின் மீது உடனடி நடவடிக்கை எடுக்க உத்தரவிட்டாா்.
இக்கூட்டத்தில் மாவட்ட வருவாய் அலுவலா் எஸ்.சந்தோஷினி சந்திரா, தோட்டக்கலைத் துறை துணை இயக்குநா் பி.தமிழ்ச்செல்வி, உதவி இயக்குநா் நக்கீரன், பட்டு வளா்ச்சித் துறை உதவி இயக்குநா் மு.சிவநாதன், செய்தி மக்கள் தொடா்பு அலுவலா் க.செந்தில்குமாா் உள்ளிட்டோா் பங்கேற்றனா்.