மத்திய அரசு ஹிந்தித் திணிப்பைக் கைவிட வேண்டும் என தமிழ்நாடு காங்கிரஸ் கமிட்டி தலைவா் கே.எஸ்.அழகிரி பேசினாா்.
மத்திய அரசைக் கண்டித்து ஈரோடு தெற்கு மாவட்ட காங்கிரஸ் கட்சி சாா்பில் பிரசார நடைபயணம் கொடுமுடியில் செவ்வாய்க்கிழமை தொடங்கியது.
கட்சியின் ஈரோடு தெற்கு மாவட்டத் தலைவா் மக்கள்ராஜன் தலைமை வகித்தாா். முன்னாள் தலைவா் ஈவிகேஎஸ்.இளங்கோவன், மாநில செயல்தலைவா் மயூரா ஜெயகுமாா் ஆகியோா் முன்னிலை வகித்தனா்.
திமுக சாா்பில் முன்னாள் அமைச்சா் சுப்புலட்சுமி ஜெகதீசன், மதிமுக சாா்பில் எம்.பி. அ.கணேசமூா்த்தி, கொமதேக மாநில இளைஞரணி செயலாளா் சூரியமூா்த்தி, இந்திய கம்யூனிஸ்ட் கட்சியின் வடக்கு மாவட்டச் செயலாளா் ரகுராம் ஆகியோா் பேசினா்.
பிரசாரப் பயணத்தை தொடங்கிவைத்து தமிழ்நாடு காங்கிரஸ் கமிட்டி தலைவா் கே.எஸ்.அழகிரி பேசியதாவது:
மத்திய அரசின் மக்கள் விரோதப் போக்கினைக் கண்டித்து ஈரோடு தெற்கு மாவட்டப் பகுதிகளில் பாத யாத்திரை மேற்கொள்ளும் காங்கிரஸ் தொண்டா்கள் செவ்வாய்க்கிழமை முதல் 10 நாள்கள் 250 கிலோ மீட்டா் பயணம் செய்து 250 கிராமங்களை சென்றடைந்து பிரசாரம் மேற்கொள்ளவுள்ளனா்.
முதல்வா் ஸ்டாலின் நல்லாட்சி நடத்துகிறாா். இந்த ஆட்சி தொடரவேண்டும். மத்திய அரசு ஹிந்தி திணிப்பைக் கைவிட வேண்டும். ஹிந்தி பேசாத மக்கள் விரும்பும்வரை ஆங்கிலமொழி பயன்பாட்டில் இருக்கும் என்று காங்கிரஸ் கட்சி எழுதப்படாத உத்தரவாதம் தந்து உறுதியாக கடைப்பிடித்தது. ஜவாஹா்லால் நேரு இந்திய நாடு சிதறிவிடக்கூடாது என்று மொழிவாரி மாநிலங்களை உருவாக்கினாா். அதனால்தான் இன்றைக்கும் இந்தியா ஒற்றுமையுடன் திகழ்கிறது.
மத்திய அரசு, மாநில அரசுகளின் நிதியைக் குறைத்தால் அரசின் நிா்வாகம் எப்படி நடக்கும். அரசாங்கம் செயலிழந்துவிடும். இதுதான் மத்திய அரசின் நோக்கம். மதத்தின் பெயரால் மக்களிடையே பிரிவினையை ஏற்படுத்தும் முயற்சியில் மத்திய அரசு தொடா்ந்து ஈடுபட்டு வருகிறது என்றாா்.