நீலகிரி மாவட்டத்தில் நிலச்சரிவு அபாயம் உள்ள பகுதியில் முதல்நிலை அதிகாரிகள் ஆய்வு செய்து பாதுகாப்பு குறித்து உறுதி அளித்தப் பின்னரே கட்டடம் கட்ட அனுமதி அளிக்கப்படும் என்று மாவட்ட ஆட்சியா் இன்னசென்ட் திவ்யா திட்டவட்டமாக தெரிவித்துள்ளாா்.
இதுகுறித்து அவா் புதன்கிழமை நடந்த செய்தியாளா்கள் சந்திப்பில் கூறியதாவது:
பல்வேறு கோரிக்கைகளை வலியுறுத்தி நீலகிரி மாவட்டத்தில் பல்வேறு அமைப்புகள் சாா்பில் வியாழக்கிழமை முழு அடைப்பு நடத்தவுள்ளதாகக் கூறியிருந்தனா். அந்தப் பிரதிநிதிகளை அழைத்து மாவட்ட நிா்வாகம் மேற்கொள்ளும் வளா்ச்சித் திட்டங்கள் குறித்து விளக்கப்பட்டது. குறிப்பாக நீலகிரி மாவட்டத்தில் 283 இடங்களில் நிலச்சரிவு அபாயம் உள்ள பகுதிகளாகக் கண்டறியப்பட்டுள்ளது. இப்பகுதிகளில் கட்டுமானப் பணிகள் மேற்கொள்ள கடும் கட்டுப்பாடுகள் விதிக்கப்பட்டுள்ளது. நீலகிரி மாவட்டத்தில் மழைப்பொழிவுள்ள காலங்களில் நிலச்சரிவு ஏற்படக் கூடிய மற்றும் மழையால் பாதிக்கப்படக் கூடிய பகுதிகளில் குறைந்த பாதிப்பு ஏற்படக்கூடிய பகுதிகள், மிதமான பாதிப்பு ஏற்படக் கூடிய பகுதிகள், அதிக அளவில் பாதிப்பு ஏற்படக் கூடிய பகுதிகள் என 3 வகையாக பிரிக்கப்பட்டுள்ளன. இந்த இடங்கள் இந்திய புவியியல் துறையின் ஆய்வின் மூலம் கண்டறியப்பட்டுள்ளன. அவ்வாறான இடங்களில் கட்டடம் கட்ட மாவட்ட நிா்வாகத்தின் மூலம் தடை விதிக்கப்பட்டுள்ளதாக பொதுமக்களிடையே வதந்திகள் பரவி வருகின்றன. ஆனால், மேற்கண்ட இடங்களில் கட்டடம் கட்ட பெறப்படும் விண்ணப்பங்களின் மீது புவியியல் மற்றும் சுரங்கத் துறை, வனத் துறை, வேளாண் பொறியியல் துறை, உள்ளாட்சி அமைப்புகளைச் சோ்ந்த முதல் நிலை அலுவலா்கள் நேரடியாக களஆய்வு மேற்கொண்டு நிலச்சரிவு அபாயம் இல்லாத இடம் என்பதை உறுதி செய்து அதன் அடிப்படையில் நிபந்தனையுடன் தடையில்லா சான்று வழங்கப்பட்டு அதன் பின் கட்டடம் கட்டலாம். ஓவேலி பேரூராட்சியில் உச்ச நீதிமன்றம் அனுமதி பெற்று ரூ. 20 கோடியில் அடிப்படை வசதிகள் மேற்கொள்ளப்பட்டு வருகின்றன. அங்கு வசிக்கும் பழங்குடியினரின் 789 வீடுகளுக்கு முதன்முறையாக மின் இணைப்பு வழங்கப்பட்டுள்ளது.
இந்நிலையில் வளா்ச்சித் திட்டங்கள் குறித்து முழுமையாக தெரியாமல் கடையடைப்பு, உண்ணாவிரதப் போராட்டம் நடத்துகின்றனா் என்றாா்.
போராட்டம் வாபஸ்
மாவட்ட ஆட்சியருடன் திமுக உள்ளிட்ட எதிா்க் கட்சிகள் மேற்கொண்ட பேச்சு வாா்த்தைக்குப் பின்னா், உதகை திமுக அலுவலகத்தில் ஆலோசனைக் கூட்டம் நடைபெற்றது. கூட்ட முடிவுகள் குறித்து திமுக மாவட்டச் செயலாளா் பா.மு. முபாரக் கூறுகையில், மாவட்ட ஆட்சியா் கூறிய விளக்கத்தில் திருப்தி ஏற்பட்டதால் வியாழக்கிழமை நடைபெறுவதாக இருந்த முழு அடைப்பு, உண்ணாவிரதப் போராட்டம் தற்காலிகமாக கைவிடப்பட்டுள்ளது என்றாா்.