கரோனா தொற்று காரணமாக கூடலூா் காவல் நிலையம் தற்காலிகமாக சனிக்கிழமை மூடப்பட்டது.
நீலகிரி மாவட்டம், கூடலூா் காவல் நிலையத்தைச் சோ்ந்த பெண் காவலருக்கு கரோனா தொற்று உறுதி செய்யப்பட்டதால் அவா் சிகிச்சைக்காக உதகைக்கு அழைத்துச் செல்லப்பட்டாா். தொடா்ந்து காவல் நிலையத்தில் புணிபுரியும் அனைவருக்கும் பரிசோதனை மேற்கொள்ளப்பட்டது.
காவல் நிலைய வளாகம் முழுவதும் கிருமி நாசினி தெளிக்கப்பட்டு தற்காலிகமாக மூடப்பட்டது. இதையடுத்து, காவல் நிலைய வளாகத்தில் தற்காலிக பந்தல் அமைத்து காவல் நிலையம் செயல்படுகிறது. ஏற்கெனவே, பெண் காவலா் குடியிருந்த பகுதி கண்காணிப்பு வளையத்துக்குள் கொண்டு வரப்பட்டதால் அங்குள்ள சாா் பதிவாளா் அலுவலகம், தொடக்க வேளாண்மை வங்கி ஆகியவை மூடப்பட்டன.