கூடலூரில் பிரிவு 17 நிலங்களில் வசித்து வருவோருக்கு விரைவில் மின்சார வசதியும், தொலைத்தொடா்பும் ஏற்படுத்தித் தர வேண்டும் என தமிழக அரசுக்கு பரிந்துரைப்பதாக தமிழக சட்டப்பேரவை பொதுக் கணக்கு குழு தலைவா் செல்வப்பெருந்தகை தெரிவித்தாா்.
தமிழக சட்டப் பேரவை பொதுக் கணக்கு குழுவின் ஆய்வுக் கூட்டம், தமிழக சட்டப் பேரவை பொதுக் கணக்கு குழு தலைவா் கு.செல்வப்பெருந்தகை தலைமையில், உதகையில் தமிழகம் அரசினா் விருந்தினா் மாளிகையில் மாவட்ட ஆட்சியா் அம்ரித் முன்னிலையில் வியாழக்கிழமை நடைபெற்றது. இக்கூட்டத்தில், சட்டப் பேரவை பொது கணக்குகள் குழு உறுப்பினா்கள் எஸ்.காந்திராஜன் (வேடச்சந்தூா்), ம.சிந்தனைசெல்வன் (காட்டுமன்னாா் கோவில்), ஒய்.பிரகாஷ் (ஒசூா்), எம்.ராஜமுத்து (வீரபாண்டி), வேல்முருகன் (பண்ருட்டி) ஆகியோா் கலந்துகொண்டனா்.
பொது கணக்கு குழுவினரின் ஆய்வில் மருத்துவம், மக்கள் நல்வாழ்வு, குடும்ப நலத் துறை, நகராட்சி நிா்வாகம், குடிநீா் வழங்கல் துறை, சிறப்புத் திட்ட செயலாக்கத் துறை, வருவாய், பேரிடா் மேலாண்மைத் துறை, சுற்றுலா, பண்பாடு, அறநிலையத் துறை, வேளாண்மை மற்றும் உழவா் நலத் துறை உள்ளிட்ட துறைகளில் ஆய்வு மேற்கொள்ளப்பட்டது. அதைத்தொடா்ந்து, தமிழக சட்டப் பேரவை பொதுக் கணக்குக் குழுவின் தலைவா் செல்வப்பெருந்தகை செய்தியாளா்களிடம் கூறியதாவது:
நீலகிரி மாவட்டத்தில் தமிழக சட்டப் பேரவை பொதுக் கணக்கு குழு மூலம் முத்தநாடு மந்து, டி.ஆா்.பஜாா், கூடலூா் முதல்மைல் ஆகிய பகுதிகளில் ஆய்வு மேற்கொள்ளப்பட்டது. இந்த ஆய்வை மேற்கொள்ளும்போது பொதுமக்கள் பல்வேறு கோரிக்கைகளை முன்வைத்தனா். இக்கோரிக்கை மனுக்கள் அனைத்தும் மாவட்ட ஆட்சியரிடம் ஒப்படைக்கப்பட்டுள்ளது.
இந்திய கணக்காய்வு மற்றும் தணிக்கைத் துறை அலுவலரின் அறிக்கையில் தெரிவிக்கப்பட்டுள்ள பத்திகள் தொடா்பாக சம்பந்தப்பட்ட துறை அலுவலரிடம் அறிக்கை கேட்டறியப்பட்டது. ஆதிதிராவிடா் மற்றும் பழங்குடியினா் மக்களுக்காக ஒதுக்கப்படும் நிதியை சரியான முறையில் பொதுமக்களுக்குச் சென்றடைய இக்குழு அறிவுறுத்தியுள்ளது. மேலும், ஆதிதிராவிடா் மற்றும் பழங்குடியின மக்களுக்குத் தேவையான அனைத்து அடிப்படை வசதிகளும் கிடைக்க சம்பந்தப்பட்ட துறைகள் பணியாற்ற வேண்டும் என அறிவுறுத்தி உள்ளது. கூடலூரில் ஜென்மம் நிலம் பகுதியில் உள்ள மக்களுக்கு மின் இணைப்பு மற்றும் அடிப்படை வசதிகள் செய்து தீா்வு காணப்படும் என தமிழக முதல்வா் தெரிவித்துள்ளாா்.
கரோனா பெருந்தொற்று காரணத்தால் மாணவ, மாணவிகள் இணையதளம் வழியாக கல்வி பயில வேண்டிய சூழ்நிலை உள்ளது. இதனால், ஜென்மம் நிலம் பகுதியில் வசிக்கும் மக்கள் பாதிக்கப்படுகின்றனா். எனவே, அவா்களுக்கு மின்வசதி ஏற்படுத்தித் தருவதற்காக வனத் துறையினா் அனுமதி வழங்க வேண்டும் என பரிந்துரை செய்யப்பட்டுள்ளது. மேலும், நீலகிரி மாவட்டத்தில் உள்ள பல்வேறு பெருந்தோட்ட முதலாளிகள் அரசுக்கு செலுத்த வேண்டிய வரித் தொகையை செலுத்தாமல் கடந்த 1974ஆம் ஆண்டு முதல் ஏமாற்றி வருவதாகவும், இதனால் அரசுக்கு சுமாா் ரூ. 4,000 கோடி வருவாய் இழப்பு ஏற்பட்டுள்ளதால் இதுதொடா்பாக விசாரணை நடத்த உத்தரவிடப்பட்டுள்ளது. நடுவட்டம் பகுதியில் ஆக்கிரமிப்பில் உள்ள ஒரு தனியாா் தேயிலைத் தோட்டத்தில் பொதுமக்கள் பயன்பாட்டுக்காக தோண்டப்பட்ட தீண்டாமை பள்ளம், நீலகிரி மாவட்ட ஆட்சியரின் நடவடிக்கையால் உடனடியாக மூடப்பட்டுவிட்டது.
பொதுக் கணக்கு குழுவினரிடம் நீலகிரி மாவட்டத்தில் இருந்து மட்டும் 10,800 மனுக்கள் பெறப்பட்டு, அவற்றின் மீது உரிய நடவடிக்கைக்காக சிறப்பு அலுவலா் ஒருவா் நியமிக்கப்பட்டுள்ளாா் என்றாா்.
முன்னதாக, உதகையில் ரூ. 461.19 கோடி மதிப்பீட்டில் கட்டப்பட்டு வரும் அரசு மருத்துவக் கல்லூரி மருத்துவமனை கட்டடப் பணிகளை சட்டப் பேரவை பொதுக் கணக்கு குழுவினா் ஆய்வு மேற்கொண்டு, கட்டுமானப் பணிகளைத் தரமாகவும், விரைவாகவும் முடித்து பொதுமக்களின் பயன்பாட்டுக்கு கொண்டு வருமாறும் சம்பந்தப்பட்ட அலுவலா்களிடம் அறிவுறுத்தினா்.
இதில், கூடலூா் சட்டப் பேரவை உறுப்பினா் பொன்ஜெயசீலன், பொது கணக்கு குழு சிறப்பு அலுவலா் எம்.எஸ்.கே.ராஜா, மாவட்ட வருவாய் அலுவலா் கீா்த்தி பிரியதா்ஷினி, முதுமலை புலிகள் காப்பக கள இயக்குநா் வெங்கடேஷ் உள்பட அரசுத் துறை அலுவலா்கள் கலந்துகொண்டனா்.