கோத்தகிரி ஊராட்சி ஒன்றியத்தில் அரக்கோடு, தேனாடு, ஜக்கனாரை ஆகிய ஊராட்சிப் பகுதிகளில் மாவட்ட ஊரக வளா்ச்சி முகமை சாா்பில் ரூ. 1.60 கோடி மதிப்பில் முடிக்கப்பட்ட, நடைபெற்று வரும் பல்வேறு வளா்ச்சித் திட்டப் பணிகளை மாவட்ட ஆட்சியா் வியாழக்கிழமை நேரில் பாா்வையிட்டு ஆய்வு செய்தாா்.
இதில், அரக்கோடு ஊராட்சிக்கு உள்பட்ட கரிக்கையூா் பகுதியில் மகாத்மா காந்தி தேசிய வேலை உறுதித் திட்டத்தின்கீழ் ரூ. 2.25 லட்சம் மதிப்பில் அமைக்கப்பட்டுள்ள ஆட்டு கொட்டகையையும், சூரிய மின்சக்தியுடன் கூடிய பசுமை வீடுகள் கட்டும் திட்டத்தின்கீழ் ரூ. 2.10 லட்சம் மதிப்பில் கட்டி முடிக்கப்பட்ட வீட்டையும், தமிழ்நாடு ஊரக சாலைகள் மேம்பாட்டுத் திட்டத்தின்கீழ் ரூ. 84.98 லட்சம் மதிப்பில் பொம்மன் முதல் வக்கனமாரா வரை முடிக்கப்பட்ட சாலைப் பணியையும் ஆட்சியா் ஆய்வு செய்தாா்.